ქართული წარმოშობის შვედი რეჟისორისა და სცენარისტის, ლევან აკინის, ფილმმა გზაჯვარედინი შვედეთის ყველაზე პრესტიჟულ კინოდაჯილდოებაზე ოთხი პრიზი დაიმსახურა. Guldbaggen-ის, იმავე ოქროს სკარაბეუსის დაჯილდოებაზე, რომელსაც შვედურ ოსკარადაც მოიხსენიებენ, გზაჯვარედინი წლის საუკეთესო ფილმად დასახელდა, აკინი კი — საუკეთესო რეჟისორად. ამასთან, ფილმმა საუკეთესო კინემატოგრაფიისა და საუკეთესო ხმის დიზაინის ნომინაციებშიც გაიმარჯვა.

საბოლოოდ, გზაჯვარედინი, რომელიც შვიდ ნომინაციაში იყო წარდგენილი, მიღებული პრიზების რაოდენობით წლევანდელი დაჯილდოების რეკორდსმენი გახდა სხვა ფილმთან ერთად.

ფოტო: Guldbaggen

გზაჯვარედინი ლევანისთვის რიგით მესამე სრულმეტრაჟიანი ნამუშევარია. ფილმის მთავარი გმირი ლიაა, ყოფილი მასწავლებელი, რომელიც საქართველოდან თურქეთში ტრანსგენდერი დისშვილის მოსაძებნად მიემგზავრება, რათა თავისი გარდაცვლილი დის უკანასკნელი სურვილი შეასრულოს და მისი დაკარგული შვილი იპოვოს.

აკინის ფილმის პრემიერა გასული წლის ბერლინის საერთაშორისო კინოფესტივალზე შედგა. თუმცა, ქვეყანაში არსებული პოლიტიკური კრიზისის ფონზე, აკინმა საქართველოში ფილმის ჩვენება არ ისურვა.

აღსანიშნავია, რომ Guldbaggen-ის ჯილდო წლის საუკეთესო ფილმის ნომინაციაში მიღებული აქვს აკინის წინა ნამუშევარსაც, ფილმს და ჩვენ ვიცეკვეთ (2019), რომელსაც საქართველოში არაერთგვაროვანი გამოხმაურება და საპროტესტო ტალღაც კი მოჰყვა. ამის მიუხედავად, ფილმმა საერთაშორისო აღიარება და არაერთი პრესტიჟული პრიზი დაიმსახურა.

ლევან აკინი კი უკვე საერთაშორისო პროექტებზეც მუშაობს. იგი გახმაურებული ამერიკული ტელესერიალის, ინტერვიუ ვამპირთან, ერთ-ერთი რეჟისორია.

ასევე იხილეთ:

თუ ფილმები შენი ცხოვრების განუყოფელი ნაწილია და მათი განხილვაც გიყვარს, შემოგვიერთდი ჯგუფში ერთი ფილმიც და...