"საქართველოს ახალგაზრდა იურისტთა ასოციაცია" განცხადებას ავრცელებს, სადაც შსს-ს მოუწოდებს, რომ აწარმოოს სწორი კვალიფიკაციით მიმდინარე ეფექტიანი გამოძიება როგორც პარტია საქართველოსთვის ლიდერ, გიორგი გახარიაზე, ისე ჟურნალისტ და მედიაექსპერტ ზვიად ქორიძეზე თავდასხმის ფაქტებზე. ამას გარდა, საია პროკურატურას მიმართავს, რომ განახორციელოს ქმედითი საპროცესო ზედამხედველობა და დანაშაულის ჩამდენ პირთა სისხლისსამართლებრივი დევნა.

"საჯაროდ გავრცელებული წყაროების მიხედვით, 2025 წლის 15 იანვარს ბათუმში სასტუმრო შერატონში პარტია ქართული ოცნების წევრები (დიმიტრი სამხარაძე და გიორგი მანველიძე) ჯგუფურად თავს დაესხნენ, ფიზიკური და სიტყვიერი შეურაცხყოფა მიაყენეს პარტია საქართველოსთვის ლიდერს, გიორგი გახარიას და ჟურნალისტსა და არასამთავრობო ორგანიზაცია საერთაშორისო გამჭვირვალობა საქართველოს თანამშრომელს ზვიად ქორიძეს.

პარტია ქართული ოცნების წევრების მხრიდან მოქალაქეების მიმართ ფიზიკური ანგარიშსწორება და ძალადობის წახალისება პოლიტიკის შემადგენელ ნაწილად იქცა. საგამოძიებო ორგანოების არაეფექტიანი რეაგირება, დემონსტრანტების, ჟურნალისტების, პოლიტიკური პარტიების წარმომადგენლების წინააღმდეგ ჩადენილი დანაშაულების პრაქტიკული უგულებელყოფა კი, ახალისებს ქვეყანაში არსებულ კრიმინოგენურ ვითარებას.

ამის მიუხედავად, კვლავ, მოვუწოდებთ: საქართველოს შინაგან საქმეთა სამინისტროს, აწარმოოს სწორი კვალიფიკაციით მიმდინარე ეფექტიანი გამოძიება. საქართველოს პროკურატურას: სისხლის სამართლის საქმეზე განახორციელოს ქმედითი საპროცესო ზედამხედველობა და დანაშაულის ჩამდენ პირთა სისხლისსამართლებრივი დევნა", – ნათქვამია განცხადებაში.