საზოგადოების პროტესტის შემდეგ, ეთერ თურაძე და კიდევ ორი ჟურნალისტი აჭარის ტელევიზიის პირდაპირ ეთერში შეიყვანეს.

"თქვენი შექმნილი ფაბრიკაციით მზია ამაღლობელის გაშავების კამპანიაში ხართ ჩართული…ეს ტელევიზია არის შინაგან საქმეთა სამინისტროს დანაყოფი და არა ტელევიზია. ეს ტელევიზია კიდევ ერთი უნარით გამოირჩევა, ქმნის კადრებს ადამიანების დასაპატიმრებლად. 2012 წელს ამ ტელევიზიის ხელოვნური ფაბრიკაციის წყალობით ამ ქალაქში დაიჭირეს 8 ადამიანი, მათ შორის იყო ახლანდელი ქოცი დეპუტატი ცოტნე ანანიძე, რომელიც მაშინ იყო სტუდენტი". — განაცხადა ეთერ თურაძემ აჭარის საზოგადოებრივი მაუწყებლის ეთერში.

მანამდე, ეთერ თურაძემ თქვა, რომ აჭარის ტელევიზიაში საეთერო დროს დაპირდნენ, თუმცა, სტუდიაში შესვლის შემდეგ, ის შინაგან საქმეთა სამინისტროს თანამშრომლებმა გამოაძევეს

"ველოდებოდი სტუდიაში. შემოვიდა წამყვანი, გაიკეთა მიკროფონი, მოიტანეს სკამები, წყლის ჭიქები, ჩართეს სტუდია, ამასობაში შემოცვივდნენ პოლიციელები და ძალის გამოყენებით გამომიყვანეს... ჩემი აჭარის ტელევიზიიდან გამოძევება უზრუნველყვეს შსს-ს ფორმიანმა თანამშრომლებმა. შესასვლელში არიან ნიღბიანი პირები, რომლების აპირებდნენ ჩემთვის მოეკიდებინათ ხელი. არანიღბიანმა პირებმა გამომაძევეს ეთერიდან. გილოცავთ, აჭარის ტელევიზიის თანამშრომლებო, თქვენ ხართ შინაგან საქმეთა სამინისტროს დანაყოფი" —თქვა ეთერ თურაძემ