პროევროპულ აქციებზე, ჯგუფურ ძალადობაში მონაწილეობის ბრალდებით დაკავებული მსახიობის, ანდრო ჭიჭინაძის ადვოკატმა თორნიკე მიგინეიშვილმა მოსამართლე ქეთევან ჯაჭვაძეს აცილების შუამდგომლობა დააყენა. მოთხოვნას სხვა ბრალდებულის ადვოკატებიც შეუერთდნენ.

მალევე ცნობილი გახდა, რომ მოსამართლემ მოთხოვნა არ დააკმაყოფილა. მისი განმარტებით, ადვოკატის აცილების მოთხოვნის ორი საფუძველი ჰქონდათ, თუმცა როგორც ჯაჭვაძე ამბობს, მოსამართლის ხმის ტემბრის ცვლილება, რომელიც დაცვის მხარეს არ მოეწონა, აცილების საფუძველი ვერ გახდებოდა.

ადვოკატებმა მოსამართლის აცილება მას შემდეგ მოითხოვეს, რაც ჯაჭვაძემ გადაწყვეტილების გამოცხადებამდე წინასასამართლო სხდომის ვადის გაგრძელებაზეც გააკეთა განმარტება.

ჯაჭვაძემ აღნიშნა, რომ საგამოძიებო ვადის გაგრძელება არაერთხელ მომხდარა საქმის მოცულობის გამო და ამ შემთხვევაში კონკრეტული სახელები და გვარები არაფერ შუაშია.

მიგინეიშვილის განმარტებით, მოსამართლემ პროკურატურის პოზიცია გააჟღერა და რეპლიკის უფლებით ისარგებლა.

ადვოკატი ომარ ფურცელაძე განმარტავს, რომ ეს სამართლიანი სასამართლოს უფლების დარღვევაა. ამასთან, ადვოკატის თქმით, მოსამართლემ გადაწყვეტილების გამოცხადებამდე, წინმსწრებად გამოაცხადა საკუთარი პოზიცია. ფურცელაძის თქმით, მოსამართლემ "საკუთარი თავი კრიტიკულ ჩიხში თავად შეიყვანა". ამის თაობაზე ქეთევან ჯაჭვაძემ განმარტა, რომ კითხვაზე პასუხს თავად ადვოკატები ითხოვდნენ, თუ რატომ გაგრძელდა საგამოძიებო ვადა.

ამასთან, ბრალდების მხარე დაცვის მხარის შუამდგომლობას არ დაეთანხმა. მცირე რეპლიკით ისარგებლა მსახიობმა ანდრო ჭიჭინაძემ.

"ძალიან უცნაური პროცესია.... ჩვენ ადამიანებად გვაყალიბებს არა მხოლოდ წარსული, არამედ როგორ აღვიქვამთ და ვხედავთ მომავალს", — განაცხადა ჭიჭინაძემ.