სტრასბურგის სასამართლომ მერაბიშვილის სარჩელი ნაწილობრივ დააკმაყოფილა და დაადგინა, რომ საქართველომ ვანო მერაბიშვილს განაჩენის გამოცხადებიდან სამი თვის განმავლობაში უნდა გადაუხადოს კომპენსაცია, 4 000 ევროს ეკვივალენტი ლარში, მორალური ზიანის ასანაზღაურებლად და 8 000 ევროს ეკვივალენტი ლარში, შესაძლო გაწეული ხარჯებისათვის.

ადამიანის უფლებათა ევროპულმა სასამართლომ დაადგინა, რომ დაირღვა ადამიანის უფლებათა კონვენციის მე-18 მუხლი, მე-5 მუხლის პირველ ნაწილთან ერთად.

სასამართლოს გადაწყვეტილებით არ დაკმაყოფილდა ნაწილი, რომელიც ეხება წინასწარი პატიმრობის შეფარდებას.

მერაბიშვილის ერთ-ერთი ადვოკატი ოთო კახიძე On.ge-სთან საუბარში განმარტავს, რომ მათი მთავარი მოთხოვნა რომ ვანო მერაბიშვილის დაპატიმრება ემსახურებოდა პოლიტიკურ მიზნებს - დაკმაყოფილდა:

"წინასწარი პატიმრობის შეფარდება როგორც მოხდა, სასამართლომ ჩათვალა რომ პროცედურულად, რეკვიზიტების დონეზე, ეს გადაწყვეტილება აკმაყოფილებდა კონვენციის მიზნებს მაგრამ ეს ყველაფერი აბსოლუტურად უმნიშვნელოა რადგან მეხუთეს პირველთან დაადგინა მე-18 მუხლი"

მისივე განმარტებით, კონვენციის მე-18 მუხლს მეხუთესთან ერთად ადგენენ მაშინ, როდესაც დისკრიმინაციული მოტივით ხდება პატიმრობის შეფარდება:

"თუ რელიგიური ლიდერია რელიგიური ნიშნით, თუ ლგბტ თემის წარმომადგენელია ლგბტ ნიშნით, ამ შემთხვევაში კი პოლიტიკური ნიშნით მოხდა ამ მუხლის დადგენა".

კონვენციის მე-18 მუხლი უფლებების შეზღუდვათა გამოყენების ფარგლებს ეხება და ადგენს, რომ „ხსენებულ უფლებათა და თავისუფლებათა კონვენციით დაშვებული შეზღუდვები გამოიყენება მხოლოდ და მხოლოდ მათთვის გათვალისწინებული მიზნებისათვის“.