"რეპორტიორები საზღვრის გარეშე" (RSF) პრესის თავისუფლების ყოველწლიურ ანგარიშს აქვეყნებს, რომლის მიხედვითაც 2024 წელს ჟურნალისტური საქმიანობის დროს, ან მასთან დაკავშირებით მსოფლიოში 54 ჟურნალისტი დაიღუპა.

დოკუმენტის თანახმად, ჟურნალისტების ნახევარზე მეტი კონფლიქტურ ზონებში დაიღუპა, მესამედი — ღაზას სექტორში.

ამასთან, აღნიშნულია, რომ ღაზას სექტორი, პაკისტანი, ბანგლადეში იყო ჟურნალისტების საქმიანობისთვის ყველაზე სახიფათო რეგიონები.

მსოფლიოში, ამჟამად დაკავებულია 550 ჟურნალისტი, რაც 2023 წელთან შედარებით 7 პროცენტით მეტია. გისოსებს მიღმა ჟურნალისტების უმეტესობა იმყოფება: ისრაელში, რუსეთში, ჩინეთში, მიანმარში და ბელარუსში.

"რეპორტიორები საზღვრის გარეშე" წერს, რომ 2024 წელს, რუსეთის ფედერაციაში კიდევ რვა ჟურნალისტი დააკავეს. ამასთან, ღაზას სექტორში ომის დაწყების შემდეგ ისრაელმა ყველაზე მეტი — 17 ჟურნალისტი დააკავა და ის ახლა მსოფლიოში მესამე ადგილს იკავებს დაკავებული და დაპატიმრებული ჟურნალისტების რაოდენობის მიხედვით.