საქართველოს ახალგაზრდა იურისტთა ასოციაციის (საია) თავმჯდომარე, ნონა ქურდოვანიძე Facebook პოსტის საშუალებით ეხმიანება საჯარო სამსახურის შესახებ კანონში ინიციირებულ ცვლილებებს. იურისტი მოუწოდებს საჯარო მოსამსახურეებს, რომ არ დაწერონ განცხადებები სამსახურიდან წასვლის შესახებ, რადგან საჯარო მოხელის სამსახურიდან გათავისუფლება მისი კრიტიკული მოსაზრებების გამო, ისევ ჩაითვლება უკანონოდ და დისკრიმინაციულად.

"საჯარო სამსახურის შესახებ კანონში დაინიცირებული ცვლილებების პროექტი უნდა შევაფასოთ მიმდინარე მოვლენებთან კავშირში.

ცვლილებები განიხილება დაჩქარებული წესით, მას შემდეგ, რაც არაერთი საჯარო მოხელე გაემიჯნა ქართული ოცნების პოლიტიკას საგარეო კურსის ცვლილებასთან დაკავშირებით. შესაბამისად, დაგეგმილ ცვლილებებს პირდაპირი კავშირი აქვს მიმდინარე პროტესტთან.

ეს ცვლილებები მიზნად ისახავს ორ რამეს:

გამარტივებული პროცედურების შემოღებით და სოციალური გარანტიების შემცირებით, არასასურველი კადრებისაგან დაანონსებული წმენდა ჩატარდეს საჯარო სამსახურებში;

ამ პროცედურების შემოღებით, საჯარო მოხელეები ამყოფონ მუდმივ წნეხში, რომ თუ ხმას ამოიღებენ, გაუშვებენ მარტივად.

რა პროცედურაც არ უნდა გამარტივდეს, საჯარო მოხელის სამსახურიდან გათავისუფლება მისი კრიტიკული მოსაზრებების გამო, ისევ ჩაითვლება უკანონოდ და დისკრიმინაციულად.

საჯარო მოხელეებო, არ დაწეროთ სამსახურიდან წასვლის შესახებ განცხადებები", — ვკითხულობთ ნონა ქურდოვანიძის პოსტში.