საქართველო ლეიბორისტული პარტიი ლიდერი, შალვა ნათელაშვილი ამბობს, ბორჯომის ხეობაში, წაღვერის ტყეში ცეცხლი წვიმით ჩაქრა, თუმცა ხელისუფლებამ თავის თავზე მიიწერა. ამის შესახებ ნათელაშვილის განცხადებას პარტიის პრესსამსახური ავრცელებს.

"მთავრობის დანაშაულებრივი უმოქმედობით განადგურდა ბორჯომის უნიკალური ხეობა, ეს ყველაფერი გამოიწვია იმან, რომ ხელისუფლება ვერ შეეშვა ჯიპებს, ძვირადღირებულ ავეჯს და ვერ შექმნა ელემენტარული ხანძარსაწინააღმდეგო ავიაცია. დღეს მათი ამორალიზმი იქამდე მივიდა რომ წვიმის მადლს, მისგან ჩამქრალ ცეცხლს თავის თავზე იწერენ", - აღნიშნავს ნათელაშვილი.

ბორჯომის ხეობაში ცეცხლი თითქმის ერთი კვირა იყო, ხანძრის ჩაქრობას რამდენიმე ასეული მეხანძრე, ჯარისკაცი და შინაგან საქმეთა სამინისტროს თანამშრომელი ცდილობდა. საქართველოს ხანძრის ჩაქრობაში თურქეთის, სომხეთის და აზერბაიჯანის ცოცხალი ძალა და ტექნიკა ეხმარებოდა, ბელორუსია კი ქვეყანას ვერტმფრენით დაეხმარა. ხანძარსაწინააღმდეგო ოპერაციაში ჩართული იყო შვიდი ვერტმფრენი და ერთი თვითმფრინავი. ხანძრის ჩაქრობის პროცესში ავიაციამ 2 100-ზე მეტი რეისი შეასრულა და 5 200 ტონაზე მეტი წყალი გამოიყენა.