ბათუმელების ცნობით, 2 დეკემბერს ირაკლი კობახიძემ ხელი მოაწერა განკარგულებებს, რომელიც სახელმწიფოს მფლობელობაში არსებული მიწის ნაკვეთების ეკლესიისთვის, სიმბოლურ ფასად, 1 ლარად გადაცემას ითვალისწინებს.

კობახიძის განკარგულებით, საქართველოს ავტოკეფალიურ ეკლესიას პირდაპირი მიყიდვის ფორმით, 1 ლარად გადაეცემა დაბა მანგლისში მდებარე 3194 კვ.მეტრი არასასოფლო-სამეურნეო მიწის ნაკვეთი და ამ ნაკვეთზე არსებული 3 ნაგებობა.

ფოტო: ბათუმელები

2 დეკემბრის კიდევ ერთი განკარგულების თანახმად, 1 ლარად ეკლესიას გადასცეს ხობის მუნიციპალიტეტში, სოფელ პირველ მაისში მდებარე 12 183 კვ.მეტრი სასოფლო-სამეურნეო მიწის ნაკვეთიც. იგივე განკარგულების მიხედვით, ირაკლი კობახიძემ საქართველოს ეკონომიკისა და მდგრადი განვითარების მინისტრს თანხმობა მისცა, ეკლესიას უსასყიდლო, უზუფრუქტის წესით, გადასცეს მომიჯნავედ არსებული 3877 კვ.მეტრი მიწის ნაკვეთი და მასზე დამაგრებული ნაგებობები ხელშეკრულების გაფორმებიდან 99 წლის ვადით.

ფოტო: ბათუმელებ

კობახიძის განკარგულებით, ეკლესიას პირდაპირი მიყიდვის ფორმით, სიმბოლურ ფასად, 1 ლარად საკუთრებაში გადაეცემა მიწები ქუთაისში, ჩხოროწყუს მუნიციპალიტეტის სოფელ ჭოღასა და მარნეულში, იალღუჯაში.