თბილისის საკრებულოს დამოუკიდებელი კანდიდატი, ალეკო ელისაშვილი ამბობს, რომ ხელისუფლების ბინძური კამპანიაა ნაციონალური მოძრაობის სახელით მისთვის ხმების შეგროვება და ინფორმაციის გავრცელება. ამის შესახებ ელისაშვილმა ვიდეომიმართვა გაავრცელა.

მისი თქმით, მან ნაციონალური მოძრაობის თბილისის მერობის კანდიდატს, ზაალ უდუმაშვილს, ხელმოწერების შეგროვების შეთავაზებაზე, მადლობა გადაუხადა და დახმარებაზე უარი უთხრა.

"არავის დახმარება ამ საქმეში არ მჭირდება, გულანთებული მოხალისეების და მოქალაქეების გარდა. ყველას მინდა დავუმტკიცო, რა ძალა აქვს ხალხს", - აღნიშნავეს ელისაშვილი ვიდეომიმართვაში და დასძენს, რომ მისი სახელი რეგისტრაციისთვის საჭირო ხელმოწერებს მხოლოდ "ალეკოდ მერად" წარწერის მქონე ადამიანები აგროვებენ.

ელისაშვილის ვიდეომიმართვის ჩაწერა YouTube-ზე გავრცელებულ ვიდოეს შემდეგ გადაწყვიტა. ამ ვიდეოში ჩანს, რომ რამდენიმე პირი, ნაციონალური მოძრაობის სახელით, მოქალაქეებს ალეკო ელისაშვილის მერად რეგისტრაციისთვის საჭირო ხელმოწერას სთხოვს.

"ჩვენ ვართ ერთიანი ნაციონალური მოძრაობიდან, ვეხმარებით ალეკო ელისაშვილს, რომ შემდეგ მერის არჩევნებში მიიღოს მონაწილება", - ვიდეოში ამბობს გოგო, რომელსაც ნაციონალური მოძრაობის მაისური აცვია.

ეს პირველი შემთხვევა არაა, როცა ელისაშვილი ყალბი ინფორმაციის ან ფეისბუკ გვერდების გაკეთების შესახებ საუბრობს. მან 25 აგვისტოს On.ge-სთან საუბრისას ყალბი ფეისბუკ გვერდის შემქნაში ქართული ოცნება დაადანაშაულა. მაშინ ცრუ ინფორმაცია გავრცელდა და "ალექსანდრე ელისაშვილის მხარდამჭერების" გვერდზე დაიწერა: "დიდი მადლობა ნაციონალურ მოძრაობას ამ ინიციატივისთვის. ერთობლივი ძალებით ჩვენ აუცილებლად დავამარცხებთ ქართულ ოცნებას ჯერ თბილისში, ხოლო შემდეგ მთელს საქართველოში!" აღნიშნული პოსტი დაფინანსებული იყო.