ორგანიზაცია "პარტნიორობა ადამიანის უფლებებისთვის" ხელმძღვანელი თამარ გაბოძე სოციალურ ქსელში წერს, რომ იმყოფებიან ქუთაისის საქალაქო სასამართლოსთან არასრულწლოვანი ბიჭის დასაცავად, რომელიც გუშინ, 6 დეკემბერს ქუთაისში მიმდინარე საპროტესტო აქციაზე დააკავეს.

გაბოძეს თქმით, ახალგაზრდა პოლიციის თანამშრომლებს მანქანაში უზით და თხოვნის მიუხედავად, პოლიცია ბავშვთან კონფიდენციალურად შეხვედრის შესაძლებლობას არ აძლევს.

"ამ წუთას ვართ ქუთაისის საქალაქო სასამართლოსთან. აქციაზე დაკავებული ბავშვის დასაცავად. ბავშვი უზით მანქანაში პოლიციის თანამშრომლებს და არაერთი თხოვნის მიუხედავად, პოლიცია არ გვაძლევს ბავშვთან კონფიდენციალურად შეხვედრის შესაძლებლობას.", — წერს სოციალურ ქსელში "პარტნიორობა ადამიანის უფლებებისთვის" ხელმძღვანელი.

შეგახსენებთ, ქუთაისში მიმდინარე საპროტესტო აქციაზე არასრულწლოვანის დაკავებისას პირდაპირი ეთერის კადრებში ვიხილეთ, რომ ბიჭმა გონება დაკარგა და გონწასული იწვა ქვაფენილზე, თუმცა პოლიციელები მაინც ცდილობდნენ მის დაკავებას.