საქართველოს პირველი არხი საგანგებო განცხადებას ავრცელებს:

"მაყურებელი პირდაპირ ეთერში ადევნებს თვალყურს პირველი არხის ჟურნალისტებზე განხორციელებულ არნახულ ზეწოლას, განსაკუთრებით მიზანმიმართულად და პროვოკაციულად მოქმედებენ ცალკეული ტელევიზიების წარმომადგენლები და არ გვეძლევა მუშაობის საშუალება.

კატეგორიულად მოვითხოვთ, მოგვეცეს ჩვენი პროფესიული საქმიანობის შესრულების შესაძლებლობა.

ერთადერთი დაპირება, რაც მივეცით ჩვენს მაყურებელს, არის ის, რომ პირველი არხი იყო და დარჩება თავისუფალი და დაიცავს სარედაქციო დამოუკიდებლობას ნებისმიერი ზეწოლის მიუხედავად", — წერია განცხადებაში.

შეგახსენებთ, რომ საზოგადოებრივი არხის შენობასთან მოქალაქეები და ჟურნალისტები გუშინ შეიკრიბნენ და ეთერის დათმობა მოითხოვეს. აქციის მონაწილეები ამბობენ, რომ არხი არ გამოხატავს საზოგადოების ინტერესებს, არ ემსახურება ხალხს და არის მმართველი პარტიის გავლენის ქვეშ.