საკრებულოს დამოუკიდებელი კანდიდატი, ალეკო ელისაშვილი, რომელსაც თბილისის მერობა სურს, ამბობს, რომ მისთვის სახელის გასატეხად ქართულმა ოცნებამ ფეისბუკში მისი ყალბი გვერდი შექმნა. მერობის კანდიდატმა On.ge-სთან საუბრისას აღნიშნა, რომ სახელისუფლებო პარტიამ მასში კონკურენტი დაინახა და წინა ხელისუფლებისთვის დამახასიათებელი ქმედებები გამოიყენა.

"ვისაც ამაში ეჭვი ეპარება - დაფიქრდეს, ვინ შეიძლება შექმნას ყალბი გვერდი, რომელსაც რეკლამას გაუკეთებს და ფულს გადაიხდის, ქართული ოცნების გარდა", - ამბობს ელისაშვილი, რომელიც დასძენს, რომ მსგავსი გვერდების ფუნქციონირებაში რამდენიმე ათასი იხარჯება.

ფოტო: ალექსანდრე ელისაშვილის მხარდამჭერები / Facebook

24 აგვისტოს ნაციონალურმა მოძრაობამ ალეკო ელისაშვილს არჩევნებში მონაწილეობისთვის საჭირო ხმების რაოდენობის შეგროვებაში დახმარება შესთავაზა. მერობის კანდიდატი შეთავაზებას არ დათანხმდა, თუმცა, "ალექსანდრე ელისაშვილის მხარდამჭერების" გვერდზე დაიწერა: "დიდი მადლობა ნაციონალურ მოძრაობას ამ ინიციატივისთვის. ერთობლივი ძალებით ჩვენ აუცილებლად დავამარცხებთ ქართულ ოცნებას ჯერ თბილისში, ხოლო შემდეგ მთელს საქართველოში!" აღნიშნული პოსტი დაფინანსებული იყო.

On.ge ქართული ოცნებიდან ალეკო ელისაშვილის ბრალდებაზე პასუხს ელოდება.