შსს-ს ინფორმაციის 30 ნოემბრის აქციაზე პოლიციამ 107 პირი დააკავა. არასამთავრო ორგანიზაციები და უფლებადამცველები ამბობენ, რომ ეს რიცხვი ბევრად მეტია.

დაკავებული ძმები მაისაშვილებისგან მშობლებმა ერთ-ერთის ადგილმდებარეობა არ იციან. ისინი დიღმის იზოლატორთან გამთენიას მივიდნენ. მათი ერთი შვილი დაკავებულია, ერთი ნაცემი.

"ქუჩაში რომ აგდია, დიდი თმებითა და ულვაშით შვილი და დაგდებულს რომ შავებში ჩაცმული პოლიციელი სახეში წიხლს ურტყამს, იმ ბიჭის დედა ვარ, ახლა ვნახე კადრები, არ მაჩვენებდნენ, მიფრთხილდებოდნენ", — ამბობს ელენე ჯანჯალია.

23 წლის ზვიად მაისაშვილს პოლიცია ფიზიკურად 30 ნოემბრის აქციაზე გაუსწორდა. ვიდეოკადრებში ჩანს, როგორ ურტყამს ფეხებს, სპეცდანიშნულების რაზმის წევრი ტროტუარზე დაგდებულს ახალგაზრდა ბიჭს. როგორც მაისაშვილის დედა ამბობს მას ტვინის შერყევა აქვს და ცხვირი აქვს გატეხილი.

"ახლობლის მანქანით წაიყვანეს კლინიკაში, უგონოდ იყო, როგორც მეუბნებიან. ტვინის შერყევა აქვს და ცხვირი აქვს გატეხილი. ვესაუბრე, არაფერი ახსოვს", - ამბობს ელენე ჯანჯალია და ამატებს: "ზვიადიზე ანგარიშსწორების ადგილიდან ხუთ მეტრში დააკავეს ჩემი მეორე შვილი გიორგი".

24 წლის გიორგი მაისაშვილის ზუსტი ადგილსამყოფელი მშობლებისთვის უცნობია. დიღმის იზოლატორთან დგანან და სიახლეს ელოდებიან.

"მითხრეს აქ არისო და არ ვიცი, გარეთ ვდგავართ, იქნებ დავინახოთ ეზოში მაინც, ახლა გამოყავთ დაკავებულების ნაწილი და მანქანებით გადაყავთ, სად - არ ვიცი".

ნაცემი ზვიად მაისაშვილი ინგოროყვას კლინიკაში აგრძელებს მკურნალობას.