საქართველოს პრემიერ-მინისტრი, გიორგი კვირიკაშვილი მიიჩნევს, რომ ბორჯომის რაიონში, წაღვერის ტყეში გაჩენილი ხანძრის ჩასაქრობად რუსეთის დახმარების შემოთავაზება მისასალმებელია. ამის შესახებ კვირიკაშვილმა დღეს, 24 აგვისტოს ტყეში ხანძრის გაჩენიდან მეხუთე დღეს განაცხადა.

"ჩვენ გაგვაჩნია პასუხისმგებლობის მაღალი ხარისხი ჩვენი მოსახლეობის და ჩვენი ქვეყნის წინაშე. სწორედ, გამომდინარე პასუხისმგებლობის ამ მაღალი ხარისხიდან, ვფიქრობთ, რომ იმ პირობებში, როდესაც ჩვენ გაგვაჩნია ძალიან რთული ურთიერთობა რუსეთთან, ასეთი წინადადება არის მისასალმებელი", - განაცხადა პრემიერ-მინისტრმა.

მისი თქმით, ამ ეტაპზე სიტუაცია კონტროლდება, თუმცა თურქეთის, აზერბაიჯანისა და სომხეთის გარდა სხვა ქვეყნებიც გამოთქვამენ დახმარების სურვილს. როგორც კვირიკაშვილმა აღნიშნა, საქართველოს დახმარება სურთ ამერიკის შეერთებული შტატებს, დიდი ბრიტანეთს, გერმანიას, ისრაელს, საბერძნეთს, უკრაინას, ბულგარეთსა და ირანს.

გიორგი კვირიკაშვილი რუსეთის მიერ დახმარების სურვილზე 22 აგვისტოსაც საუბრობდა. მაშინ ის აღნიშნავდა, რომ დახმარება საჭირო არ გახდა.

უკვე მეხუთე დღეა ბორჯომის რაიონში, წაღვერის ტყეში ხანძარია. 20 აგვისტოდან დღემდე სახანძრო ჯგუფების მუშაობის მიუხედავად, ხანძარი ტყის ნაწილში მაინც მძვინვარებს. ხანძრის ჩასაქრობ სამუშაოებში ჩართულები არიან როგორც საქართველოს, ისე მეზობელი ქვეყნების ასეულობით მეხანძრე, ათეულობით სახანძრო ავტომობილები და 10-მდე საჰაერო ტექნიკა.