საქართველოს პრეზიდენტმა გიორგი მარგველაშვილმა რუსთავი 2-ის ჟურნალისტის კითხვაზე, თუ რამდენად ეფექტურად აფასებს ის იმ ღონისძიებებს, რომელიც ხელისუფლებამ სტიქიასთან ბრძოლისას გაატარა, უპასუხა, რომ შეფასებების დრო ჯერ არ არის.

"შეფასება ყოველთვის ხდება მერე. დადგება შეფასების დროც, დადგება დასკვნების გაკეთების დროც. დადგება ის მომენტიც, როდესაც ჩვენ ყველანი ერთად გავიმარჯვებთ ამ სტიქიაზე და როდესაც შევაფასებთ ეფექტურობას. არა დღეს. დღეს ჩვენ გაერთიანებულნი ვართ და ყველა ერთად ვართ, რომ ეს უბედურება ავიცილოთ".

გიორგი მარგველაშვილმა გამართულ ბრიფინგზე, ასევე, მადლობა გადაუხადა ყველა იმ ადამიანს, ვინც ბორჯომის ხეობაში ხანძარს ებრძვის:

"აქ არის ჩართული ქართული ძალები, აქ ჩართულია ჩვენი მეზობელი სახელმწიფოს რესურსები და მადლობა მინდა ვუთხრა ჩვენს მეგობრებს აზერბაიჯანიდან და თურქეთიდან, რომლებიც სტიქიის ლიკვიდაციაში გვეხმარებიან".

პრეზიდენტმა მოუწოდა მოხალისეებს, რომ დამოუკიდებელი ღონისძიებები არ განახორციელონ და თავიანთი დახმარება შესთავაზონ იმ შტაბს, რომელიც ამ მიმართულებით მუშაობს.

ბორჯომის ხეობაში უკვე მესამე დღეა მთის ფერდობები იწვის. შინაგან საქმეთა სამინისტროს ინფორმაციით, მობილიზებულია მძიმე ტექნიკა და ცოცხალი ძალა, რომელსაც ხანძრის კერამდე მისასვლელი გზა გაჰყავს.