ვიქტორ ორბანმა ევროკავშირის წევრი ქვეყნების სახელი და ევროკავშირის მინისტრთა საბჭოს პრეზიდენტობის ფუნქცია კიდევ ერთხელ ბოროტად გამოიყენა, — ამის შესახებ გერმანიის პარლამენტის (ბუნდესტაგის) საგარეო ურთიერთობათა კომიტეტის თავმჯდომარემ, მიხაილ როთმა NEWS.On.ge-ს ჟურნალისტის კითხვის საპასუხოდ განაცხადა — როგორ აფასებს უნგრეთის პრემიერის, ვიქტორ ორბანის დამოკიდებულებას საქართველოში ჩატარებულ საპარლამენტო არჩევნების შედეგებთან დაკავშირებით.

როთის თქმით, მმართველ პარტიას არჩევნებში გამარჯვება მხოლოდ აზერბაიჯანმა, რუსეთმა, უნგრეთმა და ირანმა მიულოცა და "სტაბილური, მყარი, ლიბერალური დემოკრატიები ამას არ აკეთებენ".

"ევროკავშირის ინსტიტუტებმა ნათლად განაცხადეს, რომ როდესაც ორბანი ეწვია თბილისს, ის საუბრობდა უნგრეთის სახელით და არა ევროკავშირის სახელით. მან ევროკავშირის წევრი ქვეყნების სახელი და ევროკავშირის მინისტრთა საბჭოს პრეზიდენტობის ფუნქცია კიდევ ერთხელ ბოროტად გამოიყენა, რაც სასირცხვილოა. წარმოიდგინეთ, როგორი გრძნობა იქნება, როდესაც მხოლოდ აზერბაიჯანი, რუსეთი, უნგრეთი და ირანი გილოცავთ თქვენ არჩევნებში გამარჯვებას. სტაბილური, მყარი, ლიბერალური დემოკრატიები, ამას არ აკეთებენ. ეს იყო ირონია გერმანელებისთვის განსაკუთრებით", — განაცხადა როთმა.