სამეზობლო პოლიტიკისა და გაფართოების საკითხებში ევროკომისრის თანამდებობაზე წარდგენილმა კანდიდატმა, მარტა კოსმა, ევროკავშირში განაცხადა, რომ საქართველოსთან მოლაპარაკებების პროცესის გასაგრძელებლად პირველი წინაპირობაა თავიდან მოიშორონ კანონები, რომლებიც ევროპულ ღირებულებებს ეწინააღმდეგება.

"თუ ისინი გადაწყვეტენ, ევროპულ გზას დაუბრუნდნენ, მე ვიქნები პირველი, რომელიც გააგრძელებს ამ პროცესს, მაგრამ გარკვეული პირობები უნდა შესრულდეს. ჩვენ შევწყვიტეთ მოლაპარაკებების პროცესი, საქართველოს ევროპულ გზაზე ჩართვა კანონების გამო, რომლებიც არ შეესაბამება ევროკავშირის ღირებულებებს. ასე რომ პირველი წინაპირობაა, თავიდან მოიშორონ კანონები, რომლებიც ეწინააღმდეგებიან ევროპულ ღირებულებებს", — განაცხადა კოსმა.

კოსმა საქართველოში სამოქალაქო საზოგადოების მხარდაჭერის მნიშვნელობაც განიხილა.

"რაც შეეხება იმას, როგორ უნდა დავუჭიროთ მხარი სამოქალაქო საზოგადოებას. ჩემი აზრით, სამოქალაქო საზოგადოება არის მთავრობის ერთგვარი დარაჯი, მეთვალყურე არა მხოლოდ კანდიდატ ქვეყნებში, არამედ წევრ სახელმწიფოებშიც", — აღნიშნა მარტა კოსმა.