საქართველოს ელექტროენერგიისა და წყალმომარაგების მარეგულირებელ კომისიას ლეიბორისტული პარტია სხდომის ჩატარების საშუალებას არ აძლევს. კომისიამ დღეს ელექტროენერგიის ხუთ სატარიფო განაცხადზე საჯარო ადმინისტრაციული წარმოება დაიწყო. მათ შორის არის თელასის 2018 წლის სატარიფო განაცხადი.

ოპოზიციური პარტია მოითხოვს, რომ კომისიამ სხდომა შეწყვიტოს. სხდომა სიტყვიერი შელაპარაკებების ფონზე გაგრძელდა, რის გამოც საპატრულო პოლიცია გამოიძახეს. რამდენიმე წუთის შემდეგ ადგილზე ლეიბორისტული პარტიის ლიდერი შალვა ნათელაშვილი მივიდა:

"ეს იქნება ის, რაც გააკეთა შარშან ერევანმა, რომელსაც უძვირებენ დენს და მთელი ერევანი გამოვიდა ქუჩაში. 11 თეთრზე მეტი ტარიფი არ შეიძლება იყოს თბილისში... არავის არ გვაპატიებენ გადაუხდელობას. ჩაგვიჭრიან და ბავშვებს დაგვიტოვებენ მშივრებს და სიცივეში, ჩაის მოდუღების გარეშე დაგვტოვებენ. არავის არ ინდობს ეს მაფია. მათთვის მათი ღმერთი და ეროვნებაა დოლარი."

ხმაურისა და დაპირისპირების მიუხედვად, სემეკმა საკითხს კენჭი უყარა და თელასის სატარიფო განაცხადზე საჯარო ადმინისტრაციული წარმოება დაიწყება.

ელექტროენერგიის ტარიფი, რომელიც საქართველოში მოქმედებს 31 დეკემბრამდეა ძალაში, ამიტომ სემეკმა ახალი ტარიფი უნდა განსაზღვროს. კომისიაში წარდგენილი ყოველწლიური სატარიფო განაცხადით თელასი სამომხმარებლო ტარიფის გაზრდას ითხოვს. შესაბამისი განცხადება კომპანიამ 16 აგვისტოს შეიტანა.