ხვალიდან, პირველი ნოემბრიდან ზესტაფონის ფეროშენადნობი ქარხანა და ჭიათურის მაღარო მუშაობას წყვეტენ, ხოლო ასობით დასაქმებული დროებით უმუშევარი რჩება.

კომენტარს არ აკეთებს ჯორჯიან მანგანეზი, რომელიც ორივე საწარმოში 100 %-იანი წილის მფლობელია.

გუშინ, 30 ოქტომბერს შპს მაღაროელის თანამშრომლებს კომპანიის თანამშრომელი შეხვდა და განუცხადა, რომ კომპანია 5 თვით, 2025 წლის აპრილამდე აჩერებდა მუშაობას, ხოლო დასაქმებულებს 60% ხელფასის მიღების საშუალება ექნებოდათ — ამის შესახებ ბათუმელები არკვევს.

"ერთი კვირაა ჭორებია, მაგრამ მხოლოდ გუშინ დადასტურდა, რომ აპრილამდე მაღარო მუშაობას წყვეტს.

გუშინ, 30 ოქტომბერს, გამოგვიცხადეს ოფიციალურად. თემურ ხონელია შეგვხვდა დასაქმებულებს, გარკვეული მიზეზები დაასახელა, კრიზისშია კომპანია, რესტრუქტურიზაცია უნდა გავაკეთოთ და აპრილამდე უნდა გავჩერდეთო.

გვთავაზობენ ხელფასის 60%-ს გაჩერების პირობებში. მსგავსი გაჩერება იყო 2023 წლის თებერვალშიც, მაშინაც ხელფასის 60%-იანი გადახდით, მაგრამ მაშინ ბანკის სესხი ვისაც ჰქონდა, ყველას გაუჩერეს სესხები. ახლა ბანკებთან დაკავშირებით აღარაფერს ამბობენ", — ამბობს ბათუმელებთან კომპანიის თანამშრომელი, ტარიელ მიქაძე.

როგორც მიქაძე ამბობს, დასაქმებულებს კომპანიის მიმართ მთელი რიგი მოთხოვნები აქვთ.

"როგორც ვიცით, საწარმოების გაჩერება სახელმწიფოსთან შეთანხმებით მოხდა. ამიტომ უნდა ვთხოვოთ კომპანიას სახელმწიფოსთან ერთად, ან 100%-იანი ანაზღაურება შეგვინარჩუნოს, ან ალტერნატიული სამუშაოები მოგვცენ რამე, ან ბანკების სესხები გაგვიყინონ ამ ხელფასის 60%-თან ერთად", — ამბობს მიქაცაძე.

ამასთან, ბათუმელების ინფორმაციით, იმავე რიცხვიდან ზესტაფონის ფეროშენადნობი ქარხნის ყველა ღუმელი სრულად ჩერდება.

„ასეთი შემთხვევა არ გვახსოვს აქამდე, ყველა ღუმელი ერთიანად გაჩერებულიყოს. გვითხრეს, ელექტროენერგია არ ჰყოფნის საწარმოს და იმიტომ ვაჩერებთ მუშაობასო,“ – უთხრა „ბათუმელებს“ ფეროში დასაქმებულმა ერთ-ერთმა მუშამ.

ჯორჯიან მანგანეზი საქართველოში უმსხვილესი სამთო-მომპოვებელი და ფეროშენადნობების მწარმოებელი კომპანიაა, რომელიც 2006 წლიდან ოპერირებს და მას შემდეგ ქვეყნის ერთ-ერთი უმსხვილესი დამსაქმებელია, რომელიც 6 ათასამდე თანამშრომელს და რამდენიმე ძირითად ობიექტს აერთიანებს.

კომპანიას ქარხნები აქვს: ჭიათურაში, სადაც მანგანუმის მადანს მოიპოვებს, ზესტაფონში სილიკომანგანუმს აწარმოებს და საკუთრებაში აქვს "ვარციხეჰესი", სრულად განახლებად ენერგიაზე მომუშავე ჰიდროელექტროსადგური, რომლის მიერ გამომუშავებული ენერგიაც უზრუნველყოფს მოპოვება-წარმოების პროცესს.