00:31 განახლება: პოლიციის ცნობით, ტერაქტში ბრალდებული პირი ოჯახში ძალადობის გამო წარსულში ნასამართლევი იყო. მან ციხე 2012 წელს დატოვა.

00:27 განახლება: პოლიციის განცხადებით, დაშავებულების რაოდენობა 80-მდე გაიზარდა, მათ შორის 15-ის მდგომარეობა კრიტიკულია. დაღუპულთა რიცხვი არ შეცვლილა.

18 აგვისტო, 00:20 განახლება: დაღუპულებს შორის ერთი პირი ბელგიელია. ამის შესახებ ბელგიის პრემიერმინისტრმა ტვიტერზე დაწერა.

23:44 განახლება: ტერაქტზე პასუხისმგებლობა ტერორისტულმა დაჯგუფება ISIS-მა აიღო.

23:37 განახლება: კატალონიის პრეზიდენტის განცხადებით, ტერაქტთან დაკავშირებით, პოლიციამ კიდევ ერთი პირი დააკავა.

23:02 განახლება: საფრანგეთის პრეზიდენტმა, ემანუელ მაკრონმა, ბარსელონას ტერაქტს "ტრაგიკული" უწოდა და ესპანეთს სოლიდარობა გამოუცხადა.

მოგვიანებით მან ესპანურადაც დატვიტა:

"სოლიდარობა ბარსელონას, ჩვენ თქვენს გვერდით ვართ".

22:47 განახლება: პოლიციამ იმ პირის ფოტო გამოაქვეყნა, რომელმაც კომპანიისგან მიკროავტობუსი იქირავა, შემდეგ კი ის მოქალაქეებზე ტერაქტისთვის გამოიყენა.

22:37 განახლება: ესპანეთის შინაგან საქმეთა მინისტრმა განაცხადა, რომ ტერაქტს 13 ადამიანი ემსხვერპლა, დაშავებულია მინიმუმ 50.

22:16 განახლება: ტერაქტს რამდენიმე წუთის წინ გამოეხმაურა ამერიკის პრეზიდენტი დონალდ ტრამპი.

"ამერიკა გმობს ბარსელონაში მომხდარ ტერაქტს. ჩვენ ყველაფერს გავაკეთებთ მათ დასახმარებლად. ძლიერად იყავით, გვიყვარხართ" - წერს ტრამპი.

დღეს, 17 აგვისტოს, ბარსელონაში, ტურისტებით დატვირთულ ქუჩაზე მოსიარულეებში მიკროავტობუსი შევარდა. ის დიდი სისწრაფით მოძრაობდა და ადამიანებს ეჯახებოდა. მანქანის გაჩერების შემდეგ, მისი მძღოლი ადგილიდან გაიქცა, ხოლო ორი შეიარაღებული კაცი ბარში შევარდა.

ადგილობრივმა პოლიციამ მომხდარი ტერაქტად შეაფასა. სამართალდამცავების ცნობით, მიკროავტობუსი დაქირავებული იყო. მიმდებარე ტერიტორია ამ დრომდე გადაკეტილია და მოქალაქეები ადგილს ვერ ტოვებენ.

ფოტო: EPA

ტერაქტს გამოეხმაურა ლონდონის მერი, სადიქ ხანი და მას "ბარბაროსული აქტი" უწოდა. მან ესპანელ ხალხს მიუსამძიმრა და ადგილზე მომუშავე სასწრაფო დახმარება სიმამაცისთვის შეაქო.

"ლონდონი ტერორიზმის ბოროტების წინააღმდეგ და ბარსელონის გვერდით დგას" - დაწერა მან ტვიტერზე.