საქართველოს პრეზიდენტის საპარლამენტო მდივანი, ანა დოლიძე, რკინიგზელთა სოლიდარობის აქციაზე მივიდა. მისი თქმით, მნიშვნელოვანია, რომ ყველა უწყებაში გამოხატვის თავისუფლება იყოს დაცული და შრომითი უფლებებზე დავები მშვიდობიანად გადაწყდეს:

"რკინიგზის ადმინისტრაცია გამოთქვამს მზადყოფნას დიალოგისთვის და ღიაობისთვის რკინიგზელების წინაშე".

საქართველოს რკინიგზის გურჯაანში დასაქმებულებმა შიმშილობის დაწყების მესამე დღეს რკინიგზის დეპარტამენტთან აქცია გამართეს. მათ სოლიდარობას უცხადებენ აუდიტორია 115-სა და რკინიგზელთა ახალი პროფკავშირის წევრები.

რკინიგზელთა ახალი პროფკავშირების წარმომადგენლების განცხადებით, შიმშილობის მიზეზი სამუშაო ადგილის ცვლილება და ამ პროცესთან დაკავშირებული გადაწყვეტილებაა.

ერთ-ერთი მოშიმშილე უჩა ხვთისიაშვილი On.ge-სთან ჰყვება, რომ პირველ აგვისტოს, საქართველოს რკინიგზის გადაწყვეტილებით, ისინი გურჯაანიდან თბილისი-მარნეულის რეგიონზე გადმოიყვანეს, თუმცა რკინიგზა არ უზრუნველყოფს მათი ტრანსპორტირებისა და საცხოვრებლის ხარჯებს. მოშიმშილე თანამშრომლების განცხადებით, ცვლილებების შესახებ მათ პირველ აგვისტოს, კომპანიის წარმომადგენლებთან გამართულ შეხვედრაზე, ზეპირად აცნობეს, ხოლო შედეგად, ტრანსპორტირებისა და საცხოვრებლის ხარჯების დაფარვა მათ მოუწევთ.

On.ge-სთან საუბარში საქართველოს რკინიგზის პრესსამსახურის უფროსმა დაჩი ცაგურიამ განაცხადა, რომ გურჯაანის რეგიონში რკინიგზის დაბალი დატვირთვიდან გამომდინარე აღარ არსებობდა იმ სამუშაოს საჭიროება, რასაც მუშები ასრულებდნენ. ცაგურიას განმარტებით, კომპანიამ გადაწყვიტა თანამშრომლების თბილისი-მარნეულის რეგიონში გადმოყვანა, რაც მუშებთან შეთანხმებული იყო.

მისივე თქმით, კომპანია უზრუნველყოფს მუშების ტრანსპორტირებასა და საცხოვრებელს და გავრცელებულ ინფორმაციას სიცრუეს უწოდებს.

რკინგეზელთა პროფკავშირის წარმომადგენელი ილია ლეჟავა ამბობს, რომ მოშიმშილე თანამშრომლებს, თბილისში, სამსახურში გამოუცხადებლობის შემთხვევაში, გაათავისუფლებენ.