"ჩევნი კატეგორიული მოთხოვნა არის, რომ არჩევნებამდე შეწყდეს ყველანაირი ხის ჭრა, რომელზეც უკვე გაცემულია ნებართვა და არ გაიცეს ახალი ნებართვები ხეების ჭრაზე", - ეს განცხადება პარტიზანული მებაღეობის წევრმა, ნატა ფერაძემ გააკეთა. ფერაძე თბილისის მერობის დამოუკიდებელ კანდიდატთან, ალეკო ელისაშვილთან და სხვა აქტივისტებთან ერთად ამ წუთებში მერიის შენობასთან ბაგებში ხეების მოჭრას აპროტესტებენ.

"დღეს არის ერთ წლის თავი, რაც შარშან მოჭრეს ყაზბეგის გამზირზე ხეები და წელს, იმის მაგივრად რომ რაღაც დასკვნა გამოეტანათ კიდევ დაგვხვდა მოჭრილი ხეები. წერეთელი ისევ გვემალება, ვირიშვილიმაიმუნი ნარმანიაც არ ჩამოდის. რაც შესულები ვართ ვრეკავთ და ვითხოვთ, რომ ვიღაც პასუხისმგებელი პირი ჩამოვიდეს", - თქვა ნატა ფერაძემ.

აქტივისტები დაშლას არ აპირებენ, სანამ მოთხონის შესრულების პირობას არ მიიღებენ. ნატა ფერაძე ექსტრემალური ზომების მიღებას აანონსებს:

"ამ მოთხოვნას სანამ არ მივაღწევთ, მანამ როგორც ჩანს ყოველწლიურად ამ თარიღში შიმშილობა უნდა დავიწყოთ."

დღეს, 17 აგვისტოს ბაგებში მშენებლობის გამო 10-მდე საღი ხე მოიჭრა. თბილისის მერიის მტკიცებით, ნებართვა გაიცა 8 ხის მოჭრაზე და კომპანია იღებს ვალდებულებას, მოჭრილი ხეების სანაცვლოდ, დარგოს ხეები და მოაწყოს მწვანე სივრცე. ალეკო ელისაშვილის მონაცემებით, კი უკვე მოჭრილია 9 ჯანსაღი ხე, ხოლო ნებართვა გაცემულია 15 ხის მოჭრაზე. 2016 წლის პირველ სექტემბერს თბილისის მერმა დავით ნარმანიამ ხეების მოჭრასთან დაკავშირებით მორატორიუმი გამოაცხადა. ნარმასია ამბობდა, რომ მორატორიუმი გაგრძელდებოდა მანამ, ვიდრე ხეების მოჭრასთან დაკავშირებით ახალი რეგულაციები არ იქნებოდა შემოღებული. პარტიზანული მებაღეობის იურისტი ვახტანგ სახოკია მერიაში განცხადების შესატანად მივიდა, რომელიც აღნიშნული მორატორიუმის დარღვევას უკავშირდებოდა. ამასთან, სახოკია მერიაში მანამ არ შეუშვეს, სანამ იურისტმა პატრული არ გამოიძახა.