თბილისის მერმა კახა კალაძემ დღეს, ჟურნალისტის კითხვას თუ რას ფიქრობს ოპოზიციური ძალების მიერ დაანონსებულ აქციასა და რევოლუციური მოწოდებების შესახებ უპასუხა, რომ "მათ შეუძლიათ აქცია გამართონ, თუმცა არ გასცდნენ კანონის ჩარჩოებს".

"ნებისმიერ ადამიანს შეუძლია გამოხატოს თავისი მოსაზრება. საქართველოში სიტყვისა და გამოხატვის თავისუფლება დაცულია, მაგრამ ცხადია, ეს კანონის ფარგლებში უნდა მოხდეს. ნურავის ექნება ამის ილუზია და არავის მიეცემა იმის შესაძლებლობა, რომ ძალით, ხელების გადაგრეხით ვიღაცას დაუპირისპირდეს. ყველას, ვინც კანონის ჩარჩოს გასცდება, კანონის ფარგლებში შესაბამისი ძალიან მკაცრი პასუხი გაეცემა. გამოვიდნენ, შეიკრიბონ. რადიკალური ოპოზიცია დღეს დამარცხებული და განადგურებულია. მიიღეს ის, რასაც რეალურად იმსახურებდნენ", — განაცხადა თბილისის მერმა.

მან ასევე მადლობა გადაუხადა მოსახლეობის იმ ნაწილს, ვინც მხარი დაუჭირა საქართველოს სუვერენიტეტს, დამოუკიდებლობას, ღირსებას, მშვიდობასა და ეკონომიკურ განვითარებას.

კალაძემ ასევე მადლობა გადაუხადა მოსახლეობის იმ ნაწილს, ვინც მხარი დაუჭირა საქართველოს "სუვერენიტეტს დამოუკიდებლობას, ღირსებას, მშვიდობასა და ეკონომიკურ განვითარებას".

"მინდა, კიდევ ერთხელ მადლობა გადავუხადო 1 მილიონ 120 000 ადამიანს, ვინც გამოვიდა და მხარი დაუჭირა საქართველოს სუვერენიტეტს, დამოუკიდებლობას, ღირსებას, ღირსეულ მომავალს, მშვიდობის შენარჩუნებას და ეკონომიკურ განვითარებას.

რადიკალიზმი, ბოროტება და ის სიბინძურე, რასაც ბოლო წლებსა და თვეებში ვხედავთ, ხელისუფლების სათავეში ვერასდროს მოვა. როგორ შეიძლება ქვეყნის მოღალატეს და აგენტს მოსახლეობამ ქვეყნის ბედი ანდოს? ქართველი ხალხი ბრძენია, ზურგის ტვინით გრძნობს ყველაფერს. შესაბამისად, საქართველოს მოსახლეობა დადგა იქ, სადაც ქვეყნის მომავალს სჭირდებოდა“, — განაცხადა თბილისის მერმა.

შეგახსენებთ, რომ 26 ოქტომბერს საქართველოში გამართულმა საპარლამენტო არჩევნებმა დასავლელი პოლიტიკოსების დიდი კრიტიკა გამოიწვია. საერთაშორისო სადამკვირვებლო მისიების განცხადებით, არჩევნები უპრეცედენტო დარღვევების ფონზე მიმდინარეობდა.

საერთაშორისო კრიტიკის მიუხედავად, საქართველოს პრემიერმინისტრმა, ირაკლი კობახიძემ თქვა, რომ ქვეყანაში არჩევები უპრეცედენტოდ მშვიდ გარემოში ჩატარდა.

ამასთან, საქართველოს პრეზიდენტმა, სალომე ზურაბიშვილმა და ოპოზიციურმა პარტიებმა არჩევნების შედეგები არ აღიარეს.

ზურაბიშვილმა დღეს, 28 ოქტომბერს პარლამენტის წინ აქცია დააანონსა, რომლის მიზანიც არის ის, რომ საქართველოს საზოგადოებამ საერთაშორისო საზოგადოებას ევროპული არჩევანი დაანახოს.