უკვე რამდენიმე კვირაა რაც HBO ჰაკერების შემოტევას ვერ აუდის. მათ ჯერ GOT-ის სერიები გამოაქვეყნეს, შემდეგ სცენარი, იურიდიულ ინფორმაცია, ასევე თანამშრომლობის ხელშეკრულებები და სხვადასხვა სერიალში დაკავებული მსახიობების საკონტაქტო ინფორმაცია.

საერთო ჯამში ჰაკერებმა არხის 1,5 ტერაბაიტი ინფორმაცია მოიპარეს.

რამდენიმე დღის წინ ინდოეთის პოლიციამ ოთხი ადამიანი სამეფო კარის თამაშების იმ სერიის გავრცელებისთვის დააკავა, რომელიც ეთერში ჯერ არ იყო გასული.

საიტის შემდეგ ჰაკერების მომდევნო სამიზნე HBO-ს სოციალური ქსელების, ტვიტერისა და ფეისბუქის ანგარიშები გახდა. გატეხილ ექაუნთებში კიბერდამნაშავეებმა შეტყობინებები დატოვეს, მათი თქმით, ისინი ჯგუფ OurMine-ის წარმომადგენლები არიან.

"გამარჯობა, ჩვენ ვართ OurMine და უბრალოდ თქვენს უსაფრთხოებას ვამოწმებთ. HBO-ს გუნდს მოვუწოდებთ დაგვიკავშირდნენ, რათა უსაფრთხოების სისტემა გააუმჯობესონ", დაწერეს ჰაკერებმა ტვიტერში, HBO-ს გვერდზე.

ამ დროისათვის მსგავსი შინაარსის პოსტები HBO-ს ორივე ანგარიშიდან წაშლილია, თუმცა უცნობია რა ზომების გატარებას გეგმავს არხი.