საქართველოს პრეზიდენტმა, სალომე ზურაბიშვილმა ქართველ ამომრჩეველს მიმართა, გააკრიტიკა ხელისუფლება წინასწარი შედეგებით მანიპულაციისთვის და აღნიშნა, რომ თავად მოთმინებით დაელოდება არჩევნების შედეგების გამოცხადებას.

"უმრავლესობის წარმომადგენლები ძალიან არადემოკრატიულად, არაეროვნულად აცხადებენ, რომ უკვე მოვიგეთო და გვაგებინებენ, რომ სპეცრაზმი შევიდა მთავრობის ეზოში... მე დაველოდები, როგორც ევროპელი, როგორც ღირსეული ქართველი, დაველოდები შედეგებს და ყველა ერთად გავიგებთ, როცა დრო მოვა, ამ შედეგებს", — განაცხადა სალომე ზურაბიშვილმა.

გარდა ამისა, პრეზიდენტმა აღნიშნა, რომ ქართული ოცნების ლიდერების ასეთი ნაბიჯები ფსიქოლოგიური ზეწოლის განხორციელებას ემსახურება და ამისთვის ამომრჩეველი მზად უნდა იყოს.

"არ შეშინდეთ! ეს ყველაფერი არის ფსიქოლოგიური ზეწოლა თქვენზე და პასუხი ფსიქოლოგიურ ზეწოლაზე რა არის? — თვითდაჯერება, არჩევნებზე მისვლა და შედეგების დალოდება", — აღნიშნა სალომე ზურაბიშვილმა.