საარჩევნო უბნებზე კენჭისყრის დასრულებამდე ცოტა დრო რჩება. უბნები 20 საათზე იხურება, თუმცა კენჭისყრა არ შეწყდება მანამ, სანამ რიგში მდგომი ბოლო ადამიანი არ მისცემს ხმას. საარჩევნო კოდექსის 65.8 მუხლის თანახმად, 20 საათის შემდეგ ხმის მიცემა მაინც შეეძლებათ ამომრჩევლებს, რომლებიც ამ დროისთვის რიგში იდგნენ.

კომისიის თავმჯდომარის დავალებით კომისიის ერთ-ერთმა წევრმა რიგში მდგომ ამომრჩეველთა სახელები და გვარები უნდა აღრიცხოს; შემდეგ მათი რაოდენობა საუბნო საარჩევნო კომისიის თავმჯდომარეს უნდა აცნობოს, ხოლო კომისიის მდივანი კი რიგში მდგომთა რაოდენობას ჩანაწერთა წიგნში აღრიცხავს.

კენჭისყრაში მონაწილეობას 20 საათის შემდეგ ის ამომრჩევლები შეძლებენ, რომლებიც რიგში მდგომთა სიაში აღმოჩნდებიან.

პრეზიდენტმა სალომე ზურაბიშვილმა ამასთან დაკავშირებით ბრიფინგი გამართა და ემიგრანტებს შეახსენა, რომ ხმის მიცემა შეუძლია ყველას, ვინც კი საღამოს 8 საათზე უკვე საარჩევნო უბანზე, რიგში, იდგება.

"მინდა უცხოეთში მყოფ ჩემს ემიგრანტებს გავახსენო, რომ, ვინც რიგში იქნება, თქვენ გაქვთ უფლება მოითხოვოთ, კომისიიდან გამოვიდეს ადამიანი, ყველა უნდა ჩაწეროს, ყველამ უნდა მიიღოს არჩევნებში მონაწილეობა", — განაცხადა პრეზიდენტმა.