La La Land-ის რეჟისორი, დემიენ შაზელი, რამდენიმე დღის წინ ტვიტერზე დარეგისტრირდა, თუმცა, როგორც მოგვიანებით აღმოჩნდა, ამ ნაბიჯს ერთადერთი კონკრეტული მიზეზი ჰყავდა - აშშ-ის პრეზიდენტი დონალდ ტრამპი.

დარეგისტრირებისთანავე შაზელმა ტრამპის მისამართით რამდენიმე უკმაყოფილო პოსტი გამოაქვეყნა.

"გადავწყვიტე, ტვიტერზე დავრეგისტრირებულიყავი, რადგან ვგრძნობ პასუხისმგებლობას და მსურს ჩემი ხმაც შევმატო გუნდს", წერს რეჟისორი ტვიტერზე და რამდენიმე წუთის ინტერვალით ათზე მეტ ტვიტს ამატებს.

შაზელის უკმაყოფილების მიზეზი დონალდ ტრამპის განცხადება გახდა. შარლოტსვილის მოვლენებს პრეზიდენტი ტრამპი გამოეხმაურა და მკაცრად დაგმო სიძულვილის, ძალადობისა და შეუწყნარებლობის გამოვლინება "ყველას მხრიდან."

შეგახსენებთ, რომ შაბათს, 12 აგვისტოს, ვირჯინიის შტატის ქალაქ შარლოტსვილში უკიდურეს მემარჯვენეთა და ანტიფაშისტთა დემონსტრაციები შეტაკებითა და მსხვერპლით დასრულდა.

ერთი ადამიანი დაიღუპა და 19 დაშავდა, როდესაც ანტიფაშისტ დემონსტრანტთა ჯგუფში მსუბუქი ავტომანქანა შევარდა. პოლიციამ ავტომანქანის მძღოლი მალე დააკავა და მას ბრალი მკვლელობისთვის წარუდგინა.

დაღუპული 32 წლის ქალია, რომელიც აქციის დროს უბრალოდ გზაზე გადადიოდა.

შაბათსვე, პოლიციის დასახმარებლად გამოძახებული ვერტმფრენის ჩამოვარდნის შედეგად ბორტზე მყოფი ორი ადამიანი დაიღუპა.