პენტაგონის განცხადებით, აშშ-ის ავიაციამ იემენში ჰუსიტების პოზიციებზე იერიში მიიტანა. სამიზნე იარაღის 5 საწყობი იყო.

შეერთებული შტატების თავდაცვის მდივანმა ლოიდ ოსტინმა განაცხადა, რომ ამ საწყობებში მოთავსებული იარაღით ჰუსიტები რეგიონში სამხედრო და სამოქალაქო გემებს ესხმოდნენ თავს.

მისი თქმით, ეს ავიადარტყმები აჩვენებს ირანის მიერ მხარდაჭერილ ჰუსიტებს, რომ აშშ-ის წვდომის მიღმა მათი სამხედრო ინფრასტრუქტურა ვერ დარჩება.

გასული ნოემბრის შემდეგ, ჰუსიტები 100-მდე გემს დაესხნენ თავს წითელ ზღვასა და ადენის ყურეში, ორი მათგანი კი ჩაძირეს.

პარამილიტარისტული ჯგუფის განცხადებით, ეს თავდასხმები შურისძიებაა ღაზაში მიმდინარე სამხედრო კამპანიის საპასუხოდ. ოპერაციაში შორეული დისტანციის ე.წ Stealth Bomber-ებიც გამოიყენეს.

ჰუსიტების თავდასხმებმა რეგიონში მნიშვნელოვანი ეკონომიკური ზიანი მოიტანა. დიდი კომპანიები გემებით ამ მარშრუტის გავლას თავს არიდებენ.