ჩინეთის საზღვაო-სამხედრო ძალებმა 14 ოქტომბერს თაივანის ირგვლივ ერთდღიანი მასშტაბური სამხედრო წვრთნა ჩაატარეს. ოფიციალური პეკინის განცხადებით, ეს გაფრთხილება იყო "სეპარატისტული აქტების" წინააღმდეგ.

ჩინეთის სახელმწიფო მედიამ წვრთნა თაივანის პრეზიდენტის 10 ოქტომბრის გამოსვლას დაუკავშირა, რომელშიც ლაი ჩინგ-ტემ განაცხადა, რომ ჩინეთის სახალხო რესპუბლიკას არ აქვს უფლება, თაივანს წარმოადგენდეს, თუმცა თაივანი მშვიდობისა და სტაბილურობის შესანარჩუნებლად ურთიერთობის წინააღმდეგი არ არის.

წვრთნა გამთენიისას, გაუფრთხილებლად დაიწყო. ჩინეთის არმიის თქმით, მასში ყველა განშტოება მონაწილეობდა, როგორც სახმელეთო, ისე საჰაერო და საზღვაო, მათ შორის ჩინეთის ორი ავიამზიდიდან ერთ-ერთიც კი. წვრთნების მიზანი კონფლიქტის შემთხვევაში თაივანის ყველა მნიშვნელოვანი პორტის ბლოკადის სიმულაცია იყო.