საფრანგეთში, პარიზთან ახლოს, მანქანა პიცერიაში შევარდა. გარდიანის ინფორმაციით, შემთხვევის შედეგად 13 ადამიანი დაშავდა, ერთი კი დაიღუპა.

დაღუპული 13 წლის გოგოა, რომელიც ოჯახის წევრებთან ერთად პიცერიაში სადილობდა.

დაშავებულებს შორის, ხუთის მდგომარეობა კრიტიკულად მძიმეა. მათ შორისაა 3 წლის ბიჭი, რომელიც დაღუპულის ძმაა.

პოლიციამ მანქანის მძღოლი უკვე დააკავა. თავდამსხმელის თქმით, მას თვითმკვლელობა სურდა და მანქანაში ასაფეთქებლები ჰქონდა.

პოლიციის თქმით, თავდამსხმელი ნასამართლევი არ არის და ის მათთვის და უსაფრთხოების სამსახურისთვის უცნობი პირი იყო. პოლიციისთვის ჯერჯერობით ამოცანად რჩება, თავდასხმა დაგეგმილი იყო, თუ ის მძღოლის ფსიქოლოგიურმა პრობლემებმა გამოიწვია.

თვითმხილველების თქმით, მძღოლი ადგილზე მყოფმა დაცვის წევრებმა შეაჩერეს, თორემ ის მანქანის გაჩერებას არ აპირებდა.