აშშ-ის პრეზიდენტმა ჯო ბაიდენმა ქარიშხალი მილტონის მოახლოების გამო გერმანიაში ვიზიტი გადადო. მილტონი ფლორიდის სანაპიროებს დღეს, 9 ოქტომბერს მიაღწევს.

ბაიდენის ბერლინური ვიზიტი 10 ოქტომბერს იყო ჩანიშნული, საიდანაც ანგოლაში უნდა გამგზავრებულიყო, ხოლო 15 ოქტომბერს კვლავ აშშ-ში დაბრუნებულიყო. ეს პირველი შემთხვევა იქნებოდა, როცა ბაიდენი აფრიკას პრეზიდენტის რანგში ეწვია.

"ქარიშხალი მილტონის სავარაუდო ტრაექტორიისა და სიმძლავრის გათვალისწინებით, პრეზიდენტმა ბაიდენმა გადადო ვიზიტები გერმანიასა და ანგოლაში, რათა თავად უხელმძღვანელოს ქარიშხალი მილტონისათვის მოსამზადებელ და ქარიშხალი ჰელენის შედეგების აღმოსაფხვრელ სამუშაოებს აშშ-ის სამხრეთ-აღმოსავლეთში", — განაცხადა თეთრი სახლის პრესსპიკერმა კარინ ჟან-პიერმა

მეტეოროლოგებმა და პოლიტიკოსებმა ფლორიდის იმ ნაწილის მოსახლეობას, სადაც ქარიშხალი გადაივლის, სასწრაფო ევაკუაციისკენ მოუწოდეს.

სიტუაცია საგანგაშოა იმის გათვალისწინებით, რომ 10 დღის წინ შტატს 2005 წელს ქარიშხალი კატრინას შემდეგ უდიდესმა შტორმმა, ჰელენმა გადაუარა და, სულ მცრე, 225 ადამიანის დაღუპვა გამოიწვია. ასობით ადამიანი ჯერ კიდევ დაკარგულად ითვლება.