თუკი შემოდგომის გრილ დღეებს რამე დააცხუნებდა, ეს მხოლოდ დამიანო დავიდის ხრინწნარევი ხმა იქნებოდა. პოპულარული იტალიური როკჯგუფის, Måneskin-ის, წამყვანმა ვოკალისტმა სოლო კარიერის დაწყება გადაწყვიტა და სულ ახლახან პირველი სიმღერაც გამოუშვა.

Silverlines — ასე ჰქვია დამიანოს სადებიუტო სოლო სინგლს, რომელიც მუსიკოსმა Sony Music-ის ლეიბლით გამოუშვა. აღსანიშნავია, რომ დავიდთან ერთად, კომპოზიციის ერთ-ერთი ავტორი და პროდიუსერი ინგლისელი პოპვარსკვლავი Labrinth არის.

"ეს ჩემთვის განსაკუთრებული სიმღერაა", — აღნიშნა იტალიურ მედიასთან დამიანომ, — "ეს კომპოზიცია განზრახ ავირჩიე ჩემი შემოქმედებითი ცხოვრების ახალი თავის დასაწყებად და ვიმედოვნებ, რომ ხალხი მზადაა, ამ მოგზაურობაში წამომყვეს".

იტალიურმა ჯგუფმა Måneskin-მა, რომლის ვოკალისტიც დამიანოა, მსოფლიო პოპულარობა 2021 წელს, ევროვიზიის სიმღერის კონკურსში გამარჯვების შემდეგ მოიპოვა. სიმღერით Zitti e Buoni ახალგაზრდა მუსიკოსებმა იტალიას ევროფესტივალზე მესამე გამარჯვება მოუტანეს, თავად კი კიდევ უფრო დიდი სცენების გზას დაადგნენ. 2022 წლის მონაცემებით, Måneskin-ს მსოფლიოში 40 მილიონამდე ჩანაწერი აქვს გაყიდული, ჯგუფის სიმღერებს კი ყველა ციფრულ პლატფორმაზე ჯამურად ოთხ მილიარდზე მეტჯერ მოუსმინეს.

გასულ წელს დამიანოს ჰკითხეს, განიხილავდა თუ არა სამომავლოდ სოლო კარიერის დაწყებას, რაც მომღერალს არ გამოურიცხავს. ვფიქრობ, ყველა შემსრულებლის კარიერაში დგება მომენტი, როცა იგი თავისი გზით უნდა წავიდესო, დაამატა მაშინ დავიდმა.

"მთელი მსოფლიო მოვიარე, ჩემი ხმა რომ მეპოვა და ამ ძიებამ საბოლოოდ იქ მიმიყვანა, სადაც ყველაფერი დაიწყო. ჩემი სახელია დამიანო დავიდი და დღეს ჩემი ცხოვრების პირველი დღეა", — ამ სიტყვებით დააანონსა 25 წლის მომღერალმა სოლო კარიერის დაწყება რამდენიმე დღის წინ.

Måneskin-ის ფანებს კი სულაც არ აქვთ საქმე სადარდებლად; დამიანომ გავრცელებული ხმების გასაქარწყლებლად დააზუსტა, რომ მისი სოლო კარიერის დაწყება ჯგუფის დაშლას არ ნიშნავს.

ასევე იხილეთ:

თუ მუსიკა შენი ცხოვრების განუყოფელი ნაწილია და ამ თემაზე მეტის გაგება გინდა, შემოგვიერთდი ჯგუფში ერთი სიმღერაც და...