დღეს საქართველოს პარლამენტთან სოფელ შუქრუთის მოსახლეობის სოლიდარობის აქცია გაიმართა, რის შემდეგაც შუქრუთელების მხარდასაჭერად შეკრებილები, პარლამენტის მიმდებარე ტერიტორიიდან საზოგადოებრივი მაუწყებლის შენობისკენ დაიძრნენ.

აქციის მონაწილეების თქმით, ისინი საზოგადოებრივი მაუწყებლისგან შუქრუთელებსა და კომპანიის წარმომადგენლებს შორის დებატების გამართვის ორგანიზებას და პირდაპირი ეთერის დათმობას მოითხოვენ.

ცნობისთვის, დღეს ჭიათურა მენეჯმენტმა მორიგი განცხადება გაავრცელა. კომპანიამ პროტესტის მონაწილეებს "რადიკალური ჯგუფი" და "პოლიტიკურად მართულები" უწოდა და პროვოკაციების მოწყობაში დაადანაშაულა.

"ადამიანთა რადიკალური ჯგუფი, რომელიც ხელმძღვანელობს სოფელ შუქრუთში მიმდინარე დესტრუქციულ პროცესს, ასევე პარლამენტის შენობასთან მართავს აქციას, ვფიქრობთ, სრულად არის მართული ეგრეთ წოდებული სამოქალაქო სექტორის მიერ. გვაქვს საფუძვლიანი ეჭვი იმისა, რომ მათ უკან დგანან ის არასამთავრობო ორგანიზაციები, რომლებიც პირდაპირ კავშირში არიან ასევე რადიკალურ პოლიტიკურ პარტიებთან, რომლებიც თავის მხრივ, საპროტესტო აქციებს საკუთარი ვიწრო პარტიული ინტერესებისთვის იყენებს," — ნათქვამია კომპანიის განცხადებაში.