ცხოველები ხშირად გვაკვირვებენ თავიანთი უნიკალური ხასიათით, თვისებებითა თუ გონიერებით — ხანდახან ისეთ რამეს გააკეთებენ და მოისაზრებენ, ჩვენს გაოცებას, გაცინებას თუ დასევდიანებასაც ახერხებენ.

მსოფლიოს არაერთი ცნობილი ცხოველი ახსოვს, რომელთაც თავი არამხოლოდ სისაყვარლით, არამედ გამბედაობით, ერთგულებით, მტკიცე ნებისყოფით დაამახსოვრეს და არაერთი ფილმისა თუ მულტფილმის შთაგონებადაც იქცნენ. გიზიარებთ 5 ცხოველს, რომელთაც მსოფლიოს თავი სამუდამოდ დაამახსოვრეს:

1. ჰაჩიკო

ეს სია ჰაჩიკოთი რომ არ დავიწყოთ, ნამდვილი უსამართლობა იქნება — ეს იაპონელი აკიტა ხომ, ალბათ, მსოფლიოს ყველაზე ცნობილი ძაღლია.

მისი სევდიანი ისტორია, ალბათ, ყველასთვის ცნობილია. ჰაჩიკო და მისი პატრონი, პროფესორი ჰიდესაბურო უენო ტოკიოში ცხოვრობდნენ. პროფესორი უენო სამსახურში ყოველ დილით შიბუიას სადგურიდან მიდიოდა ხოლმე. ჰაჩიკო მას ყოველ დილით აცილებდა სამსახურში და მთელი დღის განმავლობაში დინჯად, ადგილიდან ფეხის მოუცვლელად ელოდა პატრონის დაბრუნებას. ერთ დღეს პროფესორი სამსახურში გარდაიცვალა და სახლში დაბრუნება ვეღარ შეძლო, თუმცა ჰაჩიკოს მისი ლოდინი არ შეუწყვიტავს — ის 9 წლის განმავლობაში დადიოდა შიბუიას სადგურზე და ყოველ დღე ელოდა საყვარელი პატრონის გამოჩენას.

ჰაჩიკოს ისტორია, ერთგულება და გონიერება უამრავი ადამიანის გულს შეეხო. მის პატივსაცემად შიბუიას სადგურზე ბრინჯაოს ქანდაკებაც აღიმართა.

2. ლაიკა

ლაიკა მსხვერპლის გაღების, უცოდველობისა და ახალი აღმოჩენების სიმბოლოა. ის მოსკოვში მცხოვრები მეტისი ცუგა იყო, რომელიც "კოსმოსური რბოლის" პერიოდში, 1957 წელს საბჭოთა მეცნიერებმა სპუტნიკ 2-ის მისიისთვის შეარჩიეს. სამწუხაროდ, ამ დროს კოსმოსში გაგზავნილი ცოცხალი არსებების უკან დაბრუნების გზა არ არსებობდა, ამიტომ ლაიკა მისიის დაწყებამდე განწირული იყო.

ლაიკა კოსმოსში 1957 წლის 3 ნოემბერს გაემგზავრა და რამდენიმე საათში დაიღუპა. ამ ისტორიის ტრაგიკული დასასრულის მიუხედავად, ლაიკას მისიამ ადამიანებს კოსმოსისკენ მიმავალი გზა გაუხსნა — მისი ღვაწლი მეცნიერებაში შეუფასებელია.

3. ბალტო

ბალტოს მულტფილმზე ბავშვობაში რამდენს გვიცრემლია, ვინ მოთვლის...

ბალტო ციმბირული ჰასკი იყო, რომელიც 1925 წელს ნამდვილი გმირი გახდა. ამ დროს ალასკის ქალაქ ნოუმში დიფტერიის ეპიდემია მძვინვარებდა, თუმცა მკაცრი ზამთრის და ტრანსპორტის გზების არარსებობის გამო ნოუმში ვაქცინის ჩამოტანა ვერ ხერხდებოდა. ეს კრიტიკული პასუხისმგებლობა მამაც და ჭკვიან ძაღლთა ჯგუფს დაევალა, რომელსაც სწორედ ჩვენი ბალტო ხელმძღვანელობდა. ბალტო საოცარი ლიდერი აღმოჩნდა — ის თავის თანაჯგუფელებს უმძიმეს კლიმატში უძღოდა წინ, მოუწია ქარიშხლის, მძიმე თოვის, ყინვის გადატანა და წამალი 1085 კილომეტრის მანძილზე უსაფრთხოდ ატარა.

1925 წლის 2 თებერვალს მამაცმა ძაღლებმა ნოუმში წამალი მიიტანეს და უამრავი ადამიანი გადაარჩინეს. ბალტო ეროვნული გმირი გახდა და მის გამბედაობისა და მიზანდასახულობის სიმბოლოდ ნიუ-იორკის ცენტრალურ პარკში ძეგლი აღიმართა.

4. "ჩაუძირავი" სემი

"ჩაუძირავი" სემის ისტორია დამთხვევებისა და ბედისწერის არსებობაში ნამდვილად დაგარწმუნებთ.

სემი კატა იყო, რომელიც მეორე მსოფლიო ომის დროს სამი გემის ჩაძირვას გადაურჩა. სემი 1941 წელს გერმანულ საბრძოლო ხომალდზე, "ბისმარკზე" იმყოფებოდა და ეკიპაჟთან ერთად მოგზაურობდა, როცა გემი ბრიტანულმა ფლოტმა ჩაძირა. სემი სწორედ ამ ბრიტანული ხომალდის, "Cossack"-ის მეზღვაურებმა გადაარჩინეს და თავიანთ გემბანზე აიყვანეს.

სამწუხაროდ, საზღვაო ბრძოლისას "Cossack"-იც დაიბომბა და ჩაიძირა. ამის შემდეგ სემი ბრიტანეთის სამეფო ხომალდზე, "Ark Royal"-ზე გადაიყვანეს, სადაც... სწორად გამოიცანით, კიდევ ერთი გემის დაღუპვას გადაურჩა! ამ ფათერაკიანი თავგადასავლების შემდეგ სემი პენსიაზე გავიდა და ხმელეთზე ერთ-ერთი მეზღვაურის ოჯახში დაიდო ბინა.

5. კუპატა

ეს სია დამსახურებული ქართველი ცხოველის გარეშე როგორ წარმოგედგინათ?

ბათუმელი ცუგა კუპატა მთელმა საქართველომ სოციალურ ქსელში გავრცელებული ვიდეოთი გაიცნო, რომელშიც ის ბავშვებს ზებრაზე გადასვლაში ეხმარებოდა და ავტომობილის უყურადღებო მძღოლებს უყეფდა.

ამის შემდეგ ცუგა ბათუმში, ერთ-ერთი შენობის კედელზე უზარმაზარი სტენსილითაც გამოსახეს. აჭარის ტურიზმისა და კურორტების დეპარტამენტის თანამშრომლებმა სახლი უყიდეს, მალევე კი ვარსკვლავიც გაუხსნეს, როგორც ხალხის რჩეულს.

კუპატა 10 წლის განმავლობაში ულამაზებდა ცხოვრებას ბათუმის მცხოვრებლებს, თუმცა ვერაგ დაავადებასთან ბრძოლაში დამარცხდა და 2023 წელს ცისარტყელაზე გაემგზავრა.

შინაური ცხოველების მეგობრებს, ძაღლებისა და კატებისთვის საუკეთესო კვებისა და მოვლის შეთავაზებისთვის Petverse ეხმარება. Petverse ოთხფეხა მეგობრების ჰიპერპრემიუმ კლასის იტალიური საკვები ბრენდის, Farmina-სა და აქსესუარებისა და მოვლის საშუალებების ბელგიური ბრენდის, M-Pets-ის, დისტრიბუტორია საქართველოში. Farmina-ს ნუტრიციოლოგთან უფასო კონსულტაციით შეგიძლია შეურჩიო შენს ძაღლსა თუ კატას შესაბამისი საკვები. დაურეკე Farmina-ს ნუტრიციოლოგს ნომერზე: 032 211 20 12 ან ეწვიე Petverse-ის შოურუმს, მის: მერაბ კოსტავას #71.