საქართველოს ახალგაზრდა იურისტთა ასოციაციაში აცხადებენ, რომ მხოლოდ რამდენიმე შემთხვევა არსებობს, როცა სასამართლომ დემირელის სახელობის სკოლა-ლიცეუმის მენეჯერის, მუსტაფა ემრე ჩაბუქის ექსტრადირების დასაშვებად მიიჩნევა შეუძლია. მსგავს ხუთ შემთხვევას საია 10 აგვისტოს აქვეყნებს.

  • მუსტაფა ემრე ჩაბუქის მოქმედება შეფასდება დანაშაულად;
  • გამოირიცხება პოლიტიკური დანაშაულის არსებობა;
  • არ იარსებებს საფუძვლიანი ვარაუდი, რომ პირის ექსტრადიცია მოთხოვნილია იმ მიზნით, რომ მოხდეს მისი მსჯავრდება და დასჯა პოლიტიკური ნიშნით;
  • არ იარსებებს საფუძვლიანი ვარაუდი, რომ თურქეთში მუსტაფა ემრე ჩაბუქი გახდება წამების, სასტიკი, არაადამიანური ან ღირსების შემლახავი მოპყრობის მსხვერპლი;
  • ექსტრადირების შემთხვევაში, ექნება სამართლიანი სასამართლოს უფლებით სარგებლობის შესაძლებლობა.

მუსტაფა ემრე ჩაბუქი თურქეთის მხარის მოთხოვნით საქართველოში 24 მაისს დააკავეს. მას თბილისის საქალაქო სასამართლომ წინასაექსტრადიციო სამთვიანი პატიმრობა შეუფარდა. 7 ივლისს კი ცნობილი გახდა, რომ საქართველომ ჩაბუქს ლტოლვილის სტატუსის მინიჭებაზე უარი უთხრა. საქართველოს ოკუპირებული ტერიტორიებიდან იძულებით გადაადგილებულ პირთა, განსახლებისა და ლტოლვილთა მინისტრი, სოზარ სუბარი ამბობდა, რომ მუსტაფა ემრე ჩაბუქი თურქეთში ექსტრადირების შემთხვევაში, ევროპული დონის ციხეში მოხვდება და წამებას არ დაექვემდებარება.

რამდენიმე დღის წინ ჩაბუქის ადვოკატებმა ლტოლვილთა და განსახლების საქმეთა სამინისტროს გადაწყვეტილება სასამართლოში გაასაჩივრეს.