აშშ-ის ყოფილი პრეზიდენტის დონალდ ტრამპის მკვლელობის მცდელობის საქმეზე დაკავებულის სავარაუდო უკრაინულმა კავშირმა აჩვენა, რომ „ცეცხლთან თამაშს“ შედეგები მოჰყვება, — ასე გამოეხმაურა კრემლის პრეს-სპიკერი, დიმიტრი პესკოვი დონალდ ტრამპის მკვლელობის მორიგ მცდელობას.

"ჩვენ ყურადღებით ვაკვირდებით ინფორმაციას, რომელიც მოდის შეერთებული შტატებიდან და ვხედავთ, რამდენად დაძაბულია სიტუაცია, მათ შორის, პოლიტიკურ კონკურენტებს შორის. პოლიტიკური ბრძოლა მწვავდება და სხვადასხვა მეთოდი გამოიყენება. ჩვენ ყურადღებით ვაკვირდებით, მაგრამ არასოდეს ჩავრეულვართ და არც ჩავერევით აშშ-ის არჩევნებში", — განაცხადა დიმიტრი პესკოვმა.

შეგახსენებთ, რომ აშშ-ის ყოფილი პრეზიდენტისა და პრეზიდენტობის კანდიდატის, დონალდ ტრამპის სიახლოვეს გუშინ, 15 სექტემბერს, სროლა მოხდა. ტრამპის კამპანიის კომუნიკაციების დირექტორმა გაავრცელა ინფორმაცია, რომ ტრამპი თავს უსაფრთხოდ გრძნობს.

58 წლის რაიან უესლი როუთი, რომელიც აშშ-ს ყოფილ პრეზიდენტ, დონალდ ტრამპის შესაძლო მკვლელობის მცდელობაშია ეჭვმიტანილი, დონალდ ტრამპს ხშირად აკრიტიკებდა და უკრაინის მხარდამჭერ პოსტებს წერდა სოციალურ ქსელში. 2022 წელს მან დაწერა, რომ მზად იყო, უკრაინისთვის ბრძოლაში დაღუპულიყო. გავრცელებული ინფორმაციით, ის ამავე წელს ის უკრაინაშიც იმყოფებოდა.