თბილისის საკრებულოს დეპუტატი, ნაციონალური მოძრაობის წევრი, ირაკლი ეძგვერაძე საქალაქო სასამართლოს მოსამართლე ნათია ტოგონიძემ სამართალდამრღვევად ცნო და 2 700 ლარით დააჯარიმა.

პროცესის დასრულების შემდეგ, კომენტარი ეძგვერაძის ადვოკატმა, ლაშა ტყეშელაძემ გააკეთა.

"მოსამართლემ ირაკლი ეძგვერაძე 2 700 ლარით დააჯარიმა იმ გარემოებაში, როცა მას ფიზიკურად გაუსწორდნენ და მრავლობითი დაზიანებები აღენიშნებოდა. ის იზოლატორში 48 საათი ჰყავდათ და თურმე, სპეციალურ საგამოძიებო სამსახურს მოძალადე პოლიციელები არც კი გამოუკითხია.

დღეს ჩვენ სასამართლოში ვიდეომტკიცებულებები წარმოვადგინეთ, სადაც ჩანდა, რომ ირაკლი ეძგვერაძე არავითარ ადმინისტრაციულ სამართალდარღვევას არ სჩადიოდა. სასამართლოს არანაირი მტკიცებულება არ ჰქონდა, რომ ეს განაჩენი გამოეტანა. ისევ და ისევ პოლიტიკური გადაწყვეტილება მიიღეს". — თქვა ადვოკატმა სასამართლო სხდომის დასრულების შემდეგ.

თავად ეძგვერაძემ დღევანდელი სასამართლო სხდომა პროტესტის ნიშნად დატოვა.

4 სექტემბერს გლდანში, ენმ-ს საკრებულოს დეპუტატი, ირაკლი ეძგვერაძე პოლიციამ ადმინისტრაციული წესით, პოლიციელებისთვის სამსახურებრივი მოვალეობის ხელის შეშლის მიზეზით დააკავა.