საქართველოს პრეზიდენტმა მუხათგვერდის ძმათა სასაფლაოზე რუსეთ-საქართველოს ომშიდაღუპულ გმირებს პატივი მიაგო და განაცხადა, რომ 2008 წლის შემდეგ რუსეთი ცდილობს საქართველოს ოკუპაციის გამართლებას და საქართველოს საზღვრების შეცვლას.

"9 წლის წინ რუსეთის ფედერაციის ჯარებმა გადმოკვეთეს სუვერენული დამოუკიდებელი ქვეყნის საზღვარი და მოახდინეს ჩვენი რეგიონების ოკუპაცია".

პრეზიდენტმა განაცხადა, რომ რუსეთმა ოკუპაცია, ჰიბრიდული ომის სახით, 90-იანების დასაწყისიდან დაიწყო, მაშინ, როდესაც საქართველომ განაცხადა, რომ დამოუკიდებელია.

ფოტო: პრეზიდენტის ადმინისტრაცია

"მაშინვე, 1992 წელს საქართველოს დამოუკიდებლობა, სუვერენიტეტი და ტერიტორიული მთლიანობა გაეროში აღიარეს. საქართველოს საზღვრების ურყეობა და მთლიანობა მაშინვე მთელმა კაცობრიობამ და მსოფლიო თანამეგობრობამ აღიარა.

2008 წლის უსამართლობის შედეგად რუსეთი ცდილობს ამ საზღვრების შეცვლას და ამ ისტორიული უსამართლობის რამე სახის შეცდომით თუ გადაცდომით გამართლებას".

პრეზიდენტის თქმით, საერთაშორისო თანამეგობრობა საქართველოს გვერდითაა და რუსეთი მარტოა.

ის ასევე გამოეხმაურა ვლადიმერ პუტინის აფხაზეთში ვიზიტს:

"დღეს, როდესაც საქართველოში, საქართველოს მხარეში, აფხაზეთში ჩასვლას გეგმავს რუსეთის ფედერაციის პრეზიდენტი, ეს სრულიად უშედეგო მცდელობაა, რამენაირად მოხდეს ისტორიული უსამართლობის ლეგიტიმაცია".

ფოტო: პრეზიდენტის ადმინისტრაცია

2008 წლის აგვისტოს რუსეთ-საქართველოს ომში საქართველოს თავდაცვის სამინისტროს 170 მოსამსახურე, შინაგან საქმეთა სამინისტროს 14 თანამშრომელი და 224 სამოქალაქო პირი დაიღუპა.

ჯანდაცვის სამინისტროს მონაცემებით, დაჭრილ/დაშავებულ სამოქალაქო და სამხედრო პირთა რაოდენობა სულ 2 232 პირს შეადგენს. მათ შორის, 1045 სამხედრო მოსამსახურე იყო.