ერთიანი ნაციონალური მოძრაობის თავმჯდომარე ირაკლი ნადირაძე, მოსამართლე ნინო ენუქიძემ 2500 ლართ დააჯარიმა.

ნადირაძემ პროცესის მერე თქვა, რომ ეს "შეშინებული ხელისუფლებების ქმედებებია" და სხვა მოლოდინი არც ჰქონია მურუსიძე-ჩინჩალაძის სანქცირებული სასამართლოდან.

„დღეს კიდევ ერთხელ დადასტურდა, რომ ამ საქმეს არაფერი საერთო არ ჰქონდა სამართალდარღვევასთან, ვნახეთ პოლიციელები, რომლებსაც ჰქონდათ ურთიერთგამომრიცხავი ჩვენებები. ამბობდნენ, რომ იყო სპეცოპერაცია, მაგრამ კამერით არ იღებდნენ, რადგან გაფუჭებული იყო. მთავარი, რატომაც ეს კეთდება, ისაა, რომ ოპოზიციის წარმომადგენლებს ხელი შეგვეშალოს საარჩევნო კამპანიის წარმოებაში. არ ვილაპარაკოთ ხალხის პრობლემებზე”, — აცხადებს ის.

ერთიანი ნაციონალური მოძრაობის წევრები — ირაკლი ეძგვერაძე და ირაკლი ნადირაძე პოლიციამ 4 სექტემბერს დააკავა.

შსს იუწყება, რომ ისინი ადმინისტრაციულ დარღვევათა კოდექსის 166-ე და 173-ე მუხლებით დააკავეს, რაც წვრილმან ხულიგნობასა და სამართალდამცველების დაუმორჩილებლობას გულისხმობს.