პოლიცია მოშიმშილე შუქრუთელებს არც კარვის და არც საძილე ტომრების გაშლის საშუალებას არ აძლევს. პოლიცია აცხადებს, რომ საქართველოს პარლამენტი სტრატეგიული ობიექტია და ადგილზე არც კარვის და არც პარალონის გაშლა არ შეიძლება.

ცოტა ხნის წინ შელაპარაკება მოხდა ჟურნალისტებსა და პოლიციელებს შორის. ჟურნალისტები პოლიციას სთხოვენ ახსნან, რატომ და რის საფუძველზე არ აძლევენ აქციის მონაწილეებს პარლამენტთან ღამის გათევის უფლება.

პარლამენტის შენობასთან რამდენიმე ათეული პოლიციელია მისული.

პარლამენტთან შეკრებილი აქციის მონაწილეები ჯორჯიან მანგანეზის საქმიანობის შედეგად სოფელ შუქრუთისთვის მიყენებული ზარალის ანაზღაურებას და პროცესში ცენტრალური ხელისუფლების ჩართვას ითხოვენ.

შუქრუთელების პროტესტს შეუერთდნენ ევოლუშენის თანამშრომლები, რომლებიც ადეკვატური შრომითი პირობების და ხელფასის ზრდის მოთხოვნით არიან გაფიცულები.


მაღაროელების უწყვეტი პროტესტი უკვე 183 დღეა გრძელდება. მეთერთმეტე დღეა, რაც 5 მათგანს პირი აქვს ამოკერილი. მათი მთავარი მოთხოვნა, კომპანიის მხრიდან კომპენსაცია და უსაფრთხო საცხოვრებელი პირობების შექმნაა. აქციის მონაწილეების თქმით, მარგანეცის მოპოვებითი სამუშაოების გამო სახლებს ქვევით მიწა მთლიანად გამოცლილია, შენობები დანგრევის პირასაა, ჭები შრება და მოსავალი არ მოდის.

კომპანია ბრალდებებს უარყოფს და რამდენჯერმე უჩივლა პროტესტის მონაწილეებს, რომ ხელი არ შეუშალონ მანგანუმის მოპოვებაში. ამას გარდა, ისინი ზარალის ანაზღაურებისთვის გაფიცულებისგან 5 500 000 ლარის გადახდას ითხოვენ. საჩხერის რაიონულმა სასამართლომ პროტესტის მონაწილე სამ პირს კი 1000-1000-ლარიანი ჯარიმა დააკისრა