თბილისში ერეკლე II-ს ძეგლის დასამზადებლად კულტურის სამინისტროს საქართველოს მთავრობის სარეზერვო ფონდიდან 955 000 ლარი გამოეყოფა. ამის შესახებ განკარგულება, რომელსაც პრემიერ-მინისტრი ირაკლი კობახიძე აწერს ხელს, მთავრობამ 9 სექტემბერს გამოსცა.

განკარგულებაში წერია, რომ საქართველოს ფინანსთა სამინისტრომ საქართველოს მთავრობის სარეზერვო ფონდიდან საქართველოს კულტურისა და სპორტის სამინისტროს 955 000 ლარი უნდა გამოუყოს.

ცნობისთვის, ერეკლე II-ს ძეგლის დადგმა კახეთის გზატკეცილზე იგეგმება, კერძოდ, შინაგან საქმეთა სამინისტროს შენობის მიმდებარედ, სადაც თბილისის მერია პარკის რეაბილიტაციის პროექტს ახორციელებს. ძეგლი მერაბ მერაბიშვილის ესკიზის მიხედვით დამზადდება.

ცნობისათვის, მიმდინარე წლის 26 აგვისტოს ცნობილი გახდა, რომ საქართველოს პრემიერ-მინისტრ, ირაკლი კობახიძის გადაწყვეტილებით, კახეთის გზატკეცილზე, შინაგან საქმეთა სამინისტროს მიმდებარე ტერიტორიაზე, ერეკლე II-ის ძეგლი აღიმართება.

კობახიძის თქმით, მათი ვალია, სათანადო პატივი მიაგონ საქართველოს ისტორიას და ყველა იმ გმირს, რომელსაც ეროვნული და რელიგიური იდენტობის თვალსაზრისით განსაკუთრებული წვლილი მიუძღვით.