ფილმი Carol უკვე ლამის საშობაო კლასიკადაა ქცეული. 2015 წელს გამოსული ფილმი, რომელშიც მთავარი როლები ქეით ბლანშეტმა და რუნი მარამ შეასრულეს, ოსკარის ექვსგზის ნომინანტი გახდა და მსოფლიოში უამრავი კინომოყვარულის მოწონება დაიმსახურა. თუმცა, როგორც ჩანს, პროექტის დასრულება საკმაოდ რთული აღმოჩნდა, მიზეზი კი, მისი შინაარსის გამო რთულად მოსაძიებელი ფინანსები იყო.

ტორონტოს წლევანდელ კინოფესტივალზე, ქეით ბლანშეტი, რომელსაც აუდიტორია ფეხზე წამომდგარი შეხვდა, გულშემატკივრებთან საუბრისას Carol-საც შეეხო. ოსკაროსანი ავსტრალიელი მსახიობის თქმით, ამ ფილმის დასრულებას ხუთი წელი და რეჟისორის რამდენჯერმე გამოცვლა დასჭირდა, რადგან პროექტისთვის დაფინანსების მოძიება გაჭირდა. მორიგი რეჟისორის წასვლის შემდეგ, თავად ბლანშეტიც აპირებდა პროექტის დატოვებას, მაგრამ შემდგომ ფილმის გადაღება ტოდ ჰეინსმა ითავა და მსახიობიც დააბრუნა.

"ეს პროცესი ხუთ წელს გაგრძელდა, რადგან ფილმის დაფინანსება არავის სურდა", — იხსენებს ბლანშეტი, — "არავის უნდოდა, ენახა... ვინ უყურებდა ფილმს, სადაც ერთის კი არა, ორი შეყვარებული ქალის ამბავია მოყოლილი?".

მსახიობის თქმით, კინოინდუსტრიაში კიდევ ბევრი რამ არის შესაცვლელი, რათა ეს სფერო უფრო "სამართლიანი და ინკლუზიური" გახდეს, მაგრამ "სასიკეთო ნაბიჯებიც გადაიდგა".

ფოტო: Wilson Webb

აღსანიშნავია, რომ Carol-ის დასრულებას, რეალურად, 18 წელი დასჭირდა, თუ გავითვალისწინებთ, რომ ფილმისთვის სცენარი ჯერ კიდევ 1997 წელს დაიწერა. ის პატრისია ჰაისმითის 1952 წელს გამოქვეყნებულ რომანს, მარილის საფასურს, ეფუძნება.

Carol-ში სიუჟეტი სწორედ 1950-იან წლებში, ნიუ-იორკში ვითარდება. ფილმი გვიყვება შუახნის ასაკის ქალის, ქეროლისა, და ფოტოგრაფიით გატაცებული ახალგაზრდის, ტერესის, მალული სასიყვარულო ურთიერთობის ამბავს. იმის მიუხედავად, რომ Carol-ს დიდი კომერციული წარმატება არ მოჰყოლია, კინოკრიტიკოსებმა აღფრთოვანებული შეფასებები არ დაიშურეს. BBC-მ ის 21-ე საუკუნის ერთ-ერთ საუკეთესო ფილმადაც დაასახელა.

ასევე იხილეთ:

თუ ფილმები შენი ცხოვრების განუყოფელი ნაწილია და მათი განხილვაც გიყვარს, შემოგვიერთდი ჯგუფში ერთი ფილმიც და...