დარგობრივი ეკონომიკისა და ეკონომიკური პოლიტიკის კომიტეტმა მეორე მოსმენით განიხილა საჯარო შესყიდვების შესახებ კანონში ცვლილების შეტანის თაობაზე კანონპროექტი და მისგან გამომდინარე საკანონმდებლო ცვლილებათა პაკეტი.

მთავრობის მიერ საკანონმდებლო ინიციატივის წესით წარმოდგენილი კანონპროექტი ითვალისწინებს საჯარო შესყიდვების შესახებ 2023 წელს პარლამენტის მიერ მიღებული კანონის ამოქმედების ვადის ორი წლით გადაწევას. კერძოდ, კანონის ძირითადი დებულებები, რომლებიც 2025 წლის 1 იანვარს უნდა ამოქმედებულიყო, 2027 წლის 1 იანვარს შევა ძალაში, ხოლო 2029 წლიდან აღნიშნული პაკეტი სრულად ამოქმედდება.

მთავრობის საპარლამენტო მდივნის ვახტანგ ბაჩიაშვილის განცხადებით, საჯარო შესყიდვების შესახებ კანონი 2027 წლიდან ერთიანი ცენტრალიზებული შემსყიდველი ორგანოს შექმნას ითვალისწინებს, ხოლო 2029 წლიდან იგეგმება შემსყიდველი ორგანიზაციების მხრიდან სერტიფიცირებული შესყიდვის სპეციალისტების დასაქმება შესაბამის საბიუჯეტო ორგანიზაციებში.

კომიტეტმა მხარი დაუჭირა წარმოდგენილ საკანონმდებლო პაკეტს, რომელსაც პარლამენტი დაჩქარებული წესით განიხილავს.