პრინცი ჰარი ახლახან მოულოდნელად ეწვია დიდ ბრიტანეთს თავისი ბიძის, ლედი დაიანას დის ქმრის დაკრძალვაზე მისასვლელად. მისი ვიზიტი საზოგადოებისა და მედიისთვის წარმოუდგენელი იყო, რადგან ჰარის დიდი ბრიტანეთის მთავრობასთან სამართლებრივი დავა აქვს და ბოლო წლებში ოჯახთანაც დაეძაბა ურთიერთობა.

როგორც ჩანს, მას შემდეგ, რაც ჰარიმ სამეფო ოჯახის წევრის მოვალეობების შესრულებაზე უარი განაცხადა და ამერიკაში გადაცხოვრდა ცოლთან, მეგან მარკლთან ერთად, მას ლედი დაიანას ოჯახმა უპირობო მხარდაჭერა გამოუცხადა, რასაც ვერ ვიტყვით უინძორებზე, მათ შორის პრინც უილიამსა და მეფე ჩარლზზე.

ლედი დაიანას და-ძმა, ჯეინ ფელოუსი და ჩარლზ სპენსერი პრინცი ჰარის გვერდით იყვნენ მაისში, მის მიერ დაფუძნებული ინვიქტუსის თამაშების 10 წლის საიუბილეო ასპარეზობაზე. ამ მნიშვნელოვან მომენტს სამეფო ოჯახის არცერთი წევრი არ დასწრებია — თამაშების პარალელურად ისინი წვეულებაზე იმყოფებოდნენ. BBC-ს სამეფო ოჯახის კორესპონდენტის, მაიკლ კოულის თქმით, "ამ დღეს ნათლად გამოჩნდა, რომ უინძორებს შორის განხეთქილება ნამდვილად არსებობს და მძიმე ფორმაშია გადასული."

პრინცი ჰარი დეიდასთან, ლედი ჯეინთან და ბიძასთან, ჩარლზ სპენსერთან ერთად

ფოტო: Getty Images

ლორდ ფელოუსის დაკრძალვაზე ჩამოსულ პრინც ჰარის დაიანას ძმამ, ჩარლზ სპენსერმა თავიანთ მამულში, ალთორპში შესთავაზა დარჩენა. პრინცესა დაიანა სწორედ აქ გაიზარდა, ამიტომ მისი შვილისთვის, ცხადია, მნიშვნელოვან სენტიმენტალურ ღირებულებას ატარებს. პრინც ჰარის დიდ ბრიტანეთში რეზიდენცია აღარ გააჩნია მას შემდეგ, რაც ის და მეგან მარკლი ფროგმორის კოტეჯებიდან 2023 წელს გამოასახლეს. ამ ყველაფრის ფონზე, ჩარლზ სპენსერის მიპატიჟება განსაკუთრებით ცხადყოფს ფაქტს, რომ სამეფო ოჯახის მიერ მოკვეთილ ჰარის დაიანას ოჯახი სრულიად უჭერს მხარს და მის გადაწყვეტილებას ეთანხმება.

ფოტო: Getty Images

სპენსერებსა და უინძორებს შორის დაძაბულობა 1981 წელს დაიწყო, ჯერ კიდევ მაშინ, როცა პრინცესა დაიანას მამამ, ჯონი სპენსერმა შვილს პრინც ჩარლზზე დაქორწინება არ ურჩია. მას სჯეროდა, რომ დაიანა სამეფო ოჯახს ვერ შეეგუებოდა და სასახლეში ცხოვრება დეპრესიაში ჩააგდებდა. "ჯონი სამეფო ოჯახს კარგად იცნობდა და სულაც არ იყო მათ მიმართ ილუზიებით განწყობილი. მას თავისი უმცროსი შვილის საზოგადოების განუწყვეტელი განსჯისა და თვალთვალისგან დაცვა უნდოდა, რაც შემდგომში მისი ცხოვრების განუყოფელი ნაწილი გახდა" — ამბობს მაიკლ კოული.

როგორ ჩანს, სპენსერების ოჯახი ხედავს, რომ პრინცმა ჰარიმ შეძლო ის, რაც მთელი ძალისხმევის მიუხედავად, პრინცესა დაიანამ ცხოვრების ბოლომდე ვერ მოახერხა. მან თავისი თავი დააპრიორიტეტა და სამეფო ოჯახისგან განცალკევებით, თავის ოჯახთან ერთად ცხოვრება არჩია.