ბათუმის საერთაშორისო კინოფესტივალი (BIAFF) წელს უკვე მესამედ არ დააფინანსა სახელმწიფო. ამის მიუხედავად ფესტივალი მაინც ტარდება.

BIAFF-ის ინფორმაციით, ძირითადი პრობლემები ფესტივალს უშუალოდ აჭარის რეგიონიდან ექმნება. BIAFF-ის შესახებ ნეგატიური ინფორმაციის გავრცელება ხდება, აპელირებენ იმაზე, რომ BIAFF არ არის ისეთი მასშტაბური, როგორ ადრე იყო. რაც, მათი განცხადებით, შეწყვეტილი დაფინანსების ფონზე, აბსურდული არგუმენტია. ამას გარდა, აჭარის კულტურის სამინისტრო და ბათუმის მერია ფესტივალების მხარდაჭერის კონკურსებში BIAFF-ს მიზანმიმართულად აიგნორებენ. ყოველგვარი ლოგიკური არგუმენტაციის გარეშე, BIAFF უკვე მესამე წელია ვერ ხვდება იმ 10-15 ფესტივალს შორის, რომელიც მერიის და სამინისტროს მიერ ფინანსდება. ეს მაშინ, როდესაც BIAFF აჭარის რეგიონში ერთ-ერთ ყველაზე წარმატებული ფესტივალია, რომელიც მნიშვნელოვან როლს ასრულებდა და ასრულებს კინოს განვითარებაში, ქალაქის ცნობადობის ამაღლებაში, ასევე სრულად პასუხობს ამ კონკურსების პირობებს და შეფასების კრიტერიუმებს, — წერს BIAFF-ი სოციალურ ქსელში.

კინოფესტივალის მენეჯერი, ზვიად ელიზიანი ბათუმელებთან აცხადებს, რომ კინოფესტივალისთვის დაფინანსების უარს ლოგიკური არგუმენტები არ აქვს, რადგან ის სრულად აკმაყოფილებს ყველა იმ კრიტერიუმს, რაც სამინისტროს და მერიას აქვს.

წელს ფესტივალი 27 სექტემბერს გაიხსნება და 3 ოქტომბერს დაიხურება. BIAFF-ზე ცალკე სექცია დაეთმობა უკრაინას და უკრაინულ კინოს. ამ სექციაში სამი უკრაინული ფილმი იქნება ნაჩვენები. სრული პროგრამა, ფესტივალის ვებგვერდზე იქნება ხელმისაწვდომი.