სომხეთის რესპუბლიკის თავდაცვის მინისტრ სურენ პაპიკიანი საქართველოში იმყოფება. ის ქვეყნის პრემიერ-მინისტრს, ირაკლი კობახიძეს და თავდაცვის მინისტრ, ირაკლი ჩიქოვანს შეხვდა.

მთავრობის კანცელარიის ინფორმაციით, პრემიერთან შეხვედრაზე ყურადღება დაეთმო ორ ქვეყანას შორის არსებულ მეგობრულ კავშირებსა და თავდაცვის სფეროში თანამშრომლობას.

ასევე აღინიშნა, რომ ორ ქვეყანას შორის გაფორმებული სტრატეგიული პარტნიორობის დეკლარაცია კარგ საფუძველს ქმნის სხვადასხვა მიმართულებით საქართველოსა და სომხეთის პარტნიორობის გასაღრმავებლად.

საუბარი შეეხო მსოფლიოსა და რეგიონში არსებულ უსაფრთხოების გარემოს და გამოწვევებთან გასამკლავებლად ერთობლივი ძალისხმევის მნიშვნელობას.

თავდაცვის მინისტრი, ირაკლი ჩიქოვანი სოციალურ ქსელში წერს, რომ შეხვედრაზე იმედი გამოთქვეს, რომ მიმდინარე წლის იანვარში ხელმოწერილი სტრატეგიული პარტნიორობის დეკლარაცია ქვეყნებს შორის სხვადასხვა სფეროში თანამშრომლობის გაძლიერებას შეუწყობს ხელს.

"შეხვედრაზე განვიხილეთ თავდაცვის სფეროში თანამშრომლობის მიმართულებები. მოხარული ვარ, რომ ჩვენს უწყებებს შორის ორმხრივი თანამშრომლობის 2024 გეგმას სომხეთში ჩემი ვიზიტის ფარგლებში მოეწერა ხელი და ამას ყოველწლიური ხასიათი აქვს", — წერს თავდაცვის მინისტრი.