უკრაინის პრეზიდენტის, ვოლოდიმირ ზელენსკის განცხადებით, უკრაინა რუსეთის სარაკეტო თავდასხმაზე პასუხს ამზადებს, — ამის შესახებ მან, უკრაინის შეიარაღებული ძალების მთავარსარდალ ალექსანდრე სირსკისთან შეხვედრისას განაცხადა.

"დღე დავიწყე ხანგრძლივი საუბრით მთავარსარდალ ალექსანდრ სირსკისთან: ვისაუბრეთ ამ სარაკეტო თავდასხმის მოგერიებაზე, ასევე რუსეთის მიმართ ჩვენს პასუხზე, რომელსაც ვამზადებთ", — აღნიშნა ზელენსკიმ.

მისი თქმით, შეხვედრაზე ასევე ისაუბრეს F-16 ტიპის გამანადგურებლების გამოყენებასა და კურსკის ოლქში მიმდინარე ოპერაციაზე.

"ვაგრძელებთ ჩვენს ქმედებებს ზუსტად ისე, როგორც ეს უკრაინას სჭირდება. ამ დღეებში გვაქვს მეტი კონტროლი და გაცვლითი ფონდის მორიგი შევსება", — განაცხადა უკრაინის პრეზიდენტმა.

გარდა ამისა, უკრაინის ლიდერის თქმით, მიიღეს რამდენიმე მნიშვნელოვანი გადაწყვეტილება უკრაინის ენერგეტიკული ობიექტების რუსეთის თავდასხმებისგან დასაცავად.

ცნობისთვის, 27 აგვისტოს უკრაინის მთელ ტერიტორიაზე საჰაერო განგაშია გამოცხადებული.

უკრაინაში რუსეთის თავდასხმას, სულ მცირე 7 ადამიანი ემსხვერპლა, ხოლო 47 — დაშავდა, მათ შორის ოთხი ბავშვია.