გუშინ, 24 აგვისტოს ევოლუშენის გაფიცულმა თანამშრომლებმა გაავრცელეს განცხადება და აღნიშნეს, რომ თუ კომპანია შეასრულებს "კანონით გათვალისწინებულ ვალდებულებებს" მაშინ, როცა გაფიცული თანამშრომლები შეწყვეტენ შიმშილობას და გაათავისუფლებენ ადმინისტრაციის შესასვლელებს.

ევოლუშენი გაფიცული თანამშრომლების წინადადებას პასუხობს და გაფიცულ თანამშრომლებს კეთილგონიერებისკენ მოუწოდებს. კომპანია ასევე აცხადებს, რომ მათი ხედვა, მოთხოვნებთან დაკავშირებით, არ შეიცვლება.

"მოვუწოდებთ გაფიცულ თანამშრომლებს, მიიღონ კეთილგონიერი გადაწყვეტილება შიმშილობის შეწყვეტასთან დაკავშირებით და აქვე, ვაცხადებთ მზაობას, დავეხმაროთ მათ რეაბილიტაციის პროცესში, მათი სურვილისა და მომართვის შემთხვევაში.

გვინდა, კიდევ გავიმეოროთ, რომ ჩვენ არაერთხელ მივმართეთ პროფკავშირს, არ გამოეყენებინათ ზომები, რომელიც მისი მხარდამჭერების ჯანმრთელობას რისკის ქვეშ აყენებს. ევოლუშენის ხედვა, მოთხოვნებთან დაკავშირებით, რომელიც არაერთი მოლაპარაკების შემდეგ, ნათელი იყო ყველა მხარისთვის, არ შეიცვლება.

ევოლუშენი მოქმედებს და მომავალშიც იმოქმედებს ქვეყანაში არსებული კანონმდებლობისა და კომპანიის შინაგანაწესის შესაბამისად, ამავდროულად, დასაქმებულების საუკეთესო ინტერესების გათვალისწინებით," – ნათქვამია განცხადებაში.

კომპანია ევოლუშენი თანამშრომლების შიმშილობაზე პასუხისმგებლობას პროფკავშირს აკისრებს და მათ ქმედებას მიუღებელს უწოდებს.

"იმედს ვიტოვებთ, რომ პროფკავშირი ასევე აცნობიერებს იმ პასუხისმგებლობას, რომელიც მათი არამართლზომიერი ბლოკადისა და ძალადობრივი ქმედებების შედეგად დადგა. იმედია, მსგავსი უკანონობა არ განმეორდება და ადამიანებს შეეძლებათ მშვიდად გააგრძელონ მუშაობა და მათი შრომითი უფლებების რეალიზაცია.

ვიმედოვნებთ რა, რომ უკანონო ბლოკადა, ძალადობა და ახალგაზრდების მიმართ განხორციელებული დამაზიანებელი ქმედებები დასრულდება, ევოლუშენი ყველა შესაძლო ზომას მიიღებს, რომ მიმდინარე შემცირების, რომელიც 1000 თანამშრომელს ეხება, მასშტაბები არ გაიზარდოს და მაქსიმალურად შეამციროს პროფკავშირის ნეგატიური გავლენა კომპანიის საოპერაციო საქმიანობაზე და დასაქმებული პირების რაოდენობაზე", — აცხადებს კომპანია.

კომპანია გაფიცულ, მოშიმშილე თანამშრომლებს მოუწოდებს შეწყვიტონ შიმშილობა და რეაბილიტაციის პროცესში დახმარებას სთავაზობს.

ცნობისთვის, 12 ივლისს, ევოლუშენ ჯორჯიას თანამშრომლების ნაწილი, ხელფასების ზრდის და სამუშაო პირობების გაუმჯობესების მოთხოვნით გაიფიცა. 21 აგვისტოს ერთ-ერთმა გაფიცულმა თანამშრომელმა პროტესტის უკიდურეს ფორმას მიმართა და პირი ამოიკერა.

გაფიცვამდე, მაუწყებელმა გაავრცელა "სქრინშოთები" კომპანიის მენეჯერების სამუშაო ჩათიდან, სადაც ისინი თანამშრომლებს გარეგნობის გამო დასცინოდნენ და იყენებდნენ სექსისტურ, რასისტულ და დისკრიმინაციულ ენას.