დნმ-ით შესაძლოა იმ ადამიანების წარმომავლობის გამორკვევა, ვინც საბერძნეთის უძველესი ცივილიზაცია შექმნეს. მკვლევრებმა ჩონჩხების გენეტიკური მონაცემების ანალიზით გამოარკვიეს, რომ ისინი ბრინჯაოს ხანის წარმომადგენლები იყვნენ. ამ პერიოდში იქმნებოდა რთული ურბანული დაგეგმარება, ასევე ანტიკური ხელოვნებისა და არქიტექტურის საუცხოო ნიმუშები.

BBC-ის ინფორმაციით, უძველეს ეგეოსელ ხალხთა შორის უმრავლესობა ფერმერებს წარმოადგენდა. ისინი ადგილზე ათასობით წლით ადრე დასახლდნენ, თუმცა მათ ისეთი გენეტიკური და კულტურული მახასიათებლები აჩვენეს, რომლებიც, სავარაუდოდ, აღმოსავლელ და ჩრდილოელ ხალხთან ურთიერთობებით წარმოიქმნა.

ჰარვარდის სამედიცინო სკოლის პროფესორები კუნძულ კრეტაზე არსებულ მინოსის ცივილიზაციიდან შემორჩენილ ნანგრევებს იკვლევენ, რომელიც ძველი წელთაღრიცხვის 2600-დან 1100 წლამდე თარიღდება. ასევე მათი ყურადღების ცენტრშია მიკენის კულტურა, რომელიც საბერძნეთის დღევანდელ ტერიტორიაზე არსებობდა ძველი წელთაღრიცხვის 1660-დან 1000 წლებში.

"მათი ისტორია მნიშვნელოვანია, რადგან ისინი ევროპის პირველი ცივილიზაციის წარმომადგენლები არიან, რომლებსაც ჰქონდათ წერის კულტურა და სხვა მახასიათებლები, რომლებიც სხვა ერებში არ იყო წარმოდგენილი. ყოველთვის არსებობდა კითხვა და ამოუხსნელი იყო, საიდან მოვიდა ეს ხალხი და როგორ შეძლეს მათ ამ საოცარი კულტურის შემქნა. უძველესი დნმ-ით ჩვენ ამ კითხვას ვუპასუხებთ" - ამბობს პროფესორი ლაზარიდის BBC-სთან საუბრისას.

ფოტო: Getty Images

პროფესორის თქმით, ამ ადამიანების უმრავლესობა [62-დან 86 პროცენტამდე] რომლებმაც ძველი ბერძნული ცივილიზაცია შექმნა, ადგილობრივი იყო. მათი წინაპრები ანატოლიიდან იყვნენ [თანამედროვე თურქეთის ტერიტორია] და ევროპამ მიწათმოქმედება სწორედ ამ ხალხისგან ისწავლა ნეოლითურ ხანაში, 7 ათასი წლის წინ.

თუმცა, ბრინჯაოს ხანიდან ირკვევა, რომ მიკენისა და მინოსის ცივილიზაცია, შესაძლოა, კავკასიის მთებიდან ან ირანიდან იღებდნენ სათავეს. მათი გენეტიკური მონაცემების 9%-დან 17%-მდე სწორედ ამ წარმომავლობისაა.

მიკენების გენეტიკა შორეული ჩრდილოეთიდან იღებს სათავეს, ადგილიდან, რომელიც აღმოსავლეთ ევროპასა და ცენტრალურ აზიას კვეთს.

ეს აღმოჩენა თანხვედრაშია ადრინდელი კვლევების შედეგებთან, რომლის მიხედვითაც, ევროპაში მიგრაციის უდიდესი პერიოდი ბრინჯაოს ხანაში დაიწყო. მომთაბარე ცხოვრების მიმდევარი ადამიანების უმრავლესობა მწყემსები იყვნენ და მათ ცენტრალურ ევროპასა და მის ჩრდილოეთით მცხოვრებლებზე გავლენა ჰქონდათ, თუმცა მომავალში მათი გავლენა სამხრეთ ევროპელებზე, მათ შორის ბერძნებზე, ბევრად უფრო ნაკლები იყო.